azîz dyaren wadey lwamen
From the Book:
Dîwanî Mewlewî
By:
Mawlawi Tawagozi (1806-1882)
2 minutes
6621 views
azîz! dyaren, wadey lwamen
elweday axir ewenamamen
dewłetekey wesił pa ne zewałen
carêwter dîden bałat meḧałen
sa diłim weş ker we îltîfatê
bidye we lawe, bwînût satê
ba beyo şinoy şîrîn řazeket
goş dero ladê meynet gazeket
axir seferen, řa xeylê dûren
menził bê payan toşe zerûren
dînit toşey çem, meylit toşey dił
řazit toşey goş, menził we menził
kê zano çon bo ey dinyay fanî?
ba bibo ne beyn gerdin azadî!
min şewê nałem coş awerdebo
segî asanet bêdar kerde bo
ya nastebo seyl dîdem, nefesê
nesîm gerd pat bero pey kesê
cemînit zeḧmet nîgam kêşabo
kefî pat we xar dîdem êşabo
ya kerdebo dił dêwaney dił teng
wextî nîşaney diłan pey xedeng
pelepel pey zewq zamê we tîrit
azar dabo tay zułfî zincîrit
ya xo to dabot we dił mezey merg
tîrî xedengit dabo netoy cerg
ya meřdebot dił dêwaney diłgîr
ce tîr’endazî kerdebot teqsîr
ya nedabot toz gerdî pałaket
perê surmey çem siftey bałaket
to buyer ce min, min zû wiyerdim
hîmmet bo, ha jar meḧrûmît werdim
çepgerd pey dûrît şana morey nerd
we zahir «bane»ş we behane kerd
ta fełek peyman ne behane bo
er sed bane bo, baz şukirane bo
er firsetiş da pey dił xemînit
’umrê dûbaren carêwter dînit
wer nastiş, azîz! to we siłamet
dîdenî dîdar kewt ew qyamet!