emcar sextiteren zamim ce caran
From the Book:
Dîwanî Mewlewî
By:
Mawlawi Tawagozi (1806-1882)
2 minutes
2666 views
emcar sextiteren zamim ce caran
çił mido daym çun gestey maran
her we zor menden řay amay nefes
tay řîşey taqet şîyenim ce des
biłêsey fîraq soçnan cestem
nasoren zaman gazî xem bestem
dûy kewawî dił poşan ser herdan
zerd kerden řuxsar payîzî derdan
sersamen ’ałem yekser ce nałem
fełek morey bed şana we tałem
meynet ser berzen, şadîm zigaren
saqî! cameket emcar wekaren
borê we meclîs la ber perdey şerim
we dewrê dîsan bezmê kermê germ
ta mutrîb we saz ḧencerey bêgerd
hurdo meqamê dewa kero derd
beł naka neyçî beyo ce lawe
we meqamekey qeqnes asawe
bezmêman cem bo çun herde caran
binoşîn camê we yadî yaran
her we zor menden nîm nefes baqî
piř ker camekit, dexîlim saqî!
er azîz wey tewr lêm kero sitem
xelasîm nîyen emcar xatir cem
’ereq çun şewnim nîşten ne řûy guł
teř kerden tatay tuẍrakey sunbuł
ce qazanî xem, dił kerden we aw
we diro maço megêrû guław
azîzim! guław boy xoy kułmî ton
er boy to nebo boy guław cekon?
zeřey boy zułifit keften ne berzan
boy gułan kerden ce berzan herzan
azîz, we mergit ger însafit bo
henî kafîyen boy zułifit pey to
îtir çi ḧacet wêt medey ’ezaw
qebûł kerî cewr megêrî guław?