کوردستانە بێشەڵانی شێرەکەی مەیدانمە
پێنج خشتەکی
لە کتێبی:
گوڵاڵەی مەریوان
بەرهەمی:
قانع (1898-1965)
2 خولەک
837 بینین
کوردستانە بێشەڵانی شێرەکەی مەیدانمە
خاک و بادی نیشتمانە بێشکەی لاوانمە
کوردسانە مەکتەبی ویژدان و هەم عیرفانمە
دڕک و داڵی کوردسانە سۆسەن و ڕێحانمە
گەرمەسیری کوردسانە شەربەت و فنجانمە
کێو و کوێستانی وڵاتی کوردسانە جەننەتم
خاکی خاوەن ڕزقی کوردە دایکی پڕ شەفەققەتم
ئاوی سارد و نانی زۆر و نیعمەتی بێ زەحمەتم
کەی وەکوو خەڵقی لە خاکی خەلقەدا پڕ مەینەتم؟
هەر ئەڵێم ئاوا بێ یاڕەب جەننەتولعەدنانمە
قەسری فیردەوسی بەرینە باخی هەنجیر و هەنار
خاوەنی حەوز و حەیات و مەڕمەڕ و جۆگە و چنار
کەوسەرم جۆگەی دەڵینە یا بناری سەرچنار
چەمچەماڵ و بازیانم مەسکەنی شیرین سوار
بێ تەماشای شارەزوورشوێن کە چاڵی دەخڵ و دانمە
«فەخری ڕازی» بی بەبێ کەس حورمەت و قەدرت نییە
سەد کروورت بێ کە خۆت ماقووڵ نەبی سوودی چییە؟
موڵکی بێ خاوەن عەزیزم هەر وەکوو داری بییە
با کەوانیش خۆش بپێکێ موزتەری لوێی ژییە
کوا پیاوێ تێبگا لەم شێعرە بێ مەعنانمە؟
قانعناسناوی ئەدەبیم ئەسپی خەیاڵم چەندێ تر سەرگەرم ئەبێ
مشتەری ئەشعارەکانم قەڕنێ تر بێ شەرم ئەبێ
ئەی ئەسەف هەر تاکوو بەردی ڕەق تەواوی نەرم ئەبێ
چەند هەژاری دڵ خەیاڵی داخڵی سەر تەرم ئەبێ
من ئەبێ چی بکەم کە ئێستە ئارەزووی مەیدانمە؟