پەیام

ئەی ئەستێرە کشاوەکەی دنیای هەستم
لە ئامێزی کام ئاسماندا جریوەت دێ؟
وا لەناو سەد چەپکە پرشنگدا و لەم دوورەوە
پرشنگی تۆ ئەناسمەوە
لەناو یەک ئاسمان ئەستێرە و
دنیایەک تیشک و ڕووناکی و دەنگ و ڕەنگدا
ئەی ئەستێرە کشاوەکە، ئەتناسمەوە.
خۆت لە ڕووبار مەشارەوە
تۆ منداڵی ئەم مەڵبەندەی
هاژەی چەم و خوڕەی ڕووبار
دەنگی چرپەی سەوڵی دڵدار
ئاشنا و ڕوشنای دەروونی تۆن
خۆت لە ڕووبار مەشارەوە
لەگەڵ یەکەم پەڵە هەوردا
بەسەر سنگی زەوی خۆتا داکەرەوە
داکەرەوە...