cergit let let bo çewaşey çepgerd
Li pirtûka:
Dîwanî Mewlewî
Berhema:
Mewlewî (1806-1882)
3 Xulek
1219 Dîtin
cergit letlet bo çewaşey çepgerd
xałot cya kerd, yekar bê to kerd
dîde, wadey seyl honey hûnawen
diłe, wextî bezim noşay zuxawen
weş řengî bazem, sadey bêřengî
şadî ba wes bo, wexten dił tengî
weşî, wadet şî weş amay we xeyr
şewqe, we tewq bay takey heway seyr
manyayî meynet serewkoy sitem
me’dûmîNasnava edebîy berkoy serewçêrey xem
çi wexten diłet ce şadî keylen
dek lêławît bo ye wefa û meylen?
ew çem be surmey xemnakî řeşte
çenî geştî deşt pay řeşt sergeşte
hamřaz ax û dax, nałe neway ney
dił kebab, çem cam, xem saqî, hûn mey
to alûdey bezim cergey hamferdan
keyfî mey, suḧbet giroy hamderdan
ew sebûn siftey piř dax bê perdax
to boy şinoy bay êłax ne demax
ew teşney řay çoł say gerden piř gerd
to sêraw ne pay wefrawanî serd
milan, serberzan, kosaran, herdan
bêşertan, ce dax wefatan merdan
çêşen arayş ser ta we daman
mer xałom we ’ezim seyrtan aman?
meşnye çînçîn çinûr nekawan
tuxwa matem be, hajey wefrawan
çinûr nekawan ew nebo pey çêş
hajey wefrawan ew nebo pey çêş
nesîm wes buyer we kosaranda
wesen şanay wełg we dyaranda
şinoy ew berze, ew nebo pey çêş
lerzey sed terze, ew nebo pey çêş
we seday serweş diłweş mezaqan
henî nelerzo kełřem ne taqan
seday marduman ew nebo pey çêş
sefay kełřeman ew nebo pey çêş
xałxasan bê’an her bar we lêw ban
hêlaney diłan ba her peşêw ban
ew ane pey dił ew nebo pey çêş
ew lane pey dił ew nebo pey çêş
dexîl hey dexîl xałokey gyanî
wêt ney seferda tenha nezanî
mergî tom herçend teşrîf berdenî
terkî xełte û xak cestem kerdenî
gyan, dosî gyanî, řefêqî řaten
surmey bînayîş tozekey paten
hey řo newaçî xuda nekerde
xem wefa û beynet ne wîrim berde
badey bêwadey fenam werdebo
şerit bo, kamîn şerit, yaran kerdebo
ta dił ce lezet dînit nakam bo
ew zewqe to dît wenem ḧeram bo
cestey xestey xar sewdayî xecił
ba bes bo, takey, ey dił weşîy dił?
çepgerd bêfirset şana morey nerd
’umrê bî ama, wiyerd, guzer kerd
zeḧmeten xelas ce dûrî werde
be hûnaw beyo ’umrî wiyerde