moskoy eyar
bîrewerîy řawestanêk le xopêşandanî cejnî yekî eyarda le meydanî sûr- mosko, sałî 1962
Li pirtûka:
Le Kořî Xebata
Berhema:
Goran (1904-1962)
1 Xulek
1109 Dîtin
ke pêkenî cejnî eyar
befrî zistan kirdî areq,
moskoy pêşřoy dinyay řizgar
cûłey tê kewt legeł şebeq.
***
le koşke berzekanî şar
mirov day da wekû baran,
be girmey wek hewrî behar,
lafawî naw şeqamekan,
berew meydanî sûr kişa;
deryay meydan têk xiroşa!
şepol ałay sûr bû, guł bû,
řengawřeng eşekayewe;
legeł her cûłe û her řengêk
core dengêk ezřayewe
êcgar şeş wişey pirşingidar
zû zû dengî edayewe,
***
wişey here piř be demyan:
aştî, aştî, aştî, aştî...
dû řengîş bû, werzişkeran
wek perde eçûne piştî:
ał: wek kułmêk germî xebat,
sewz: wek jînêk piř le aştî!
dwayî, şepol çû, şepol hat
le xełkî moskoy beheştî;
ew xełkey beheşt exwazin
bo jyanî mirov giştî!
***
coşî deng û řeng û cûłe
gyanî minî xiste ser bał,
le asoy dûrî wiłatim
wirdurd gêřam çawî xeyał:
bo řengî sewz, paş řengî ał,
bo řizgarî le jînî tał!