delîl «şem» nedît
Li pirtûka:
Dîwanî Welî Dêwane
Berhema:
Welî Dêwane (1826-1881)
3 Xulek
1278 Dîtin
delîl şem nedît, delîl şem nedît
ce lêłax amay sipî şem nedît
ahûy ser qetar neway řem nedît
nûr bînayî her dû çem nedît
nazar bawan naz’endam nedît
şox şîrîn řeng şekerřaz nedît
şem şadî pol perwanan nedît
xan syamał gişt xanan nedît
xawêr xałdar xuten xo nedît
mayey muşk erzan ’enberbo nedît
ser menził ne say sehendan nedît
gułẍunçey gułboy gułxendan nedît
«wenewşe»y bê xewş «sosen»guł nedît
deway bîmaran, deway dił nedît
zamin ne berzî êłaxan nedît
weten ne sorgey say zaxan nedît
sersewz û borçîn goławan nedît
nazdaran ne pay wefrawan nedît
«nîlûfeř» ne mewc guławan nedît
nesrîn ne payey şetawan nedît
«beřeza»y taşan serşaxan nedît
cebîn şołey şewq çiraxan nedît
serqetar řem ahûy çîn nedît
ẍezałey xuten ne maçîn nedît
şabaz şahên «şîrwanî» nedît
suraḧî bêgerd dîwanî nedît
gułendam şêwey leylaterz nedît
serdar řendan bałaberz nedît
şay kemend we pêł ’uzra tewr nedît
«hilal» kamił goşey hewr nedît
delîl amanen qibley min nedît
hem řoḧ hem îman dinya û dîn nedît
delîl amanen amay ce lêłax
qiblekem nedît beyo bê demax
delîl amanen mujde bider pêm
ḧałat qiblem îzhar bibo lêm
bizanom qiblem we şadî nîşten
sertapaş we nûr new «siweyl» řişten
meyl min pêşen ew şîrîn şêwe
wey tewr min pey ew şêt bûgim lêwe
yam xo namekey bêşertî wenden
we teḧqîq dendan dostîş kenden
mezano hem şerit werîn şikesten
esasey esbab beyn noş besten
serdî êłaxan meyliş kerden serd
serdiş cew îqrar çenî êmeş kerd
beyn noş besten dinyaş be kamen
meyl û mobetiş «abin silamErebî» en
beşq řay řasan delîl ye řasen
er řasen ce min bêzarîş wasen
řas bwaçe pêm ta diłnya bam
qeys asa ’ewdał dewr dinya bam
eger bizanom ce min wiyerden
îqrar kerdey wêş be ca nawerden
minîş we teḧqîq mewyerûm ce ew
demê şîm ne xaw ewm dî ne xew
çunke şertî wêş neberd ta we ser
çenî řeqîban wêş kerd we yawer
pey min şerit nyen yek şêwe xasî
saḧêb şerit û şûn yek mudbirmasî
şerit û wefaş bo çenîm ta we ser
beyniş dirust bo ta we řoy meḧşer
ce min zyadter meyl nedo we kes
kilîd genciş nedo be hîç kes
dił çenî hîç kes nekero pabend
her řojê kesê nekero pesend
ta namey xasîş gişt kes bwano
řeqîban bê fehim herzeş nezano
ebo be řêşxend hamseran wêş
tîr taney tał daym neden lêş
wefaş ta ser bo çun wefadaran
wêş neka we qełb nařeway şaran
ce yek beden bo řoḧiş çenî min
řêşey nexił ’ehd neknyo ce bin
bełkim ce eltaf cemîn camş
ce bêx şewbend xeyatey xamş
«řeza»y bêçarey dêwaney diłřêş
xełas bo ce dest cefay êş û nêş