ba’îsî wicûd ce mah ta mahî
Li pirtûka:
Dîwanî Mewlewî
Berhema:
Mewlewî (1806-1882)
2 Xulek
2363 Dîtin
ba’îsî wicûd ce mah ta mahî
delîlî îsbat sun’î îlahî
zyay bînayîm, nûrî çemanim
sermayey ḧeyat dîn û îmanim!
min wêm mizanû bê’emrîm kerden
îta’ey ferman ’ebdîm neberden
’umirim serapa ẍerqî ẍefłeten
zadî axirim barî xecłeten
bełam mişyo to we fezłekey wêt
kirdey min nebo behane perêt
îẍmaz key ce gird nabekarîy min
ce řû syayî û bed kirdarîy min
pey min kafîyen ey gird înfî’al
bo be řeḧmî wêt bikerem pamał
medye we tomar kirdey wiyerdem
bidye we zerdîy řuxsar awerdem
herçend şaystey ’efut nedarûn
řûy şermendegî we dergat marûn
ce beḧrî kerem bêbeşim meker
şeřî nefsanî ce řagem laber
ta be fezłî wêt bwanîmewe
ce des heway nefis bisanîmewe
bełkim cey axir pey wêm fikirê kem
tedarek pey çend tezbêḧ zikirê kem
bełam bew şerte çenîm qibûł key
behaney esbab ’efum wisûł key
nefsî bed kirdar, bêdînî bedbext
şûmî sergerdan xeyałanî sext!
pey çêş ’adetit we gunah kerden?
jarî meḧrûmîy řeḧmetit werden
řagey ḧeqîqet ce wîrit şîyen
yadit pey meḧbûb ḧeqîqî nîyen
mûtnî esłît ne xatir lwan
mêxî mobetit ne řûy xak kwan
daym guriftar arezûy xamî
yeksanen perêt nîkî û bed namî
ga xerîkî derd heway mecazî
ga meşẍûłî kesb kîbir û nyazî
ga ẍerqî heway wesłî nazarî
ga ḧîretzedey řuxsarî yarî
hîç hoşt nîyen ḧeq xeberdaren
ferda řoy ḧîsab mîzanî karen
fikirê kerewe, wadey lwaten
wextî şêwyay şewqî sewdaten
bawere we des zadê pey sefer
wêt new seferda bêtoşe meker
we dergay ḧeq ber, řûy peşîmanî
’uzir awerîker kirdey nadanî
beł lîbasî ’efu bikerot xełat
ce wextî merden biderot necat
we nisîwit bo sermayey îman
newî we řîşxend suxrîyey şeytan
we řoy meḧşerda bigêłî diłşad
ce qeydî ’îsyan diłit bo azad