hanay kelebad bad beharan
kelebad
Li pirtûka:
Şî’rekanî Turkemîr
Berhema:
Turkemîr (1750-1820)
6 Xulek
830 Dîtin
hanay kelebad! bad beharan
welî’ehd weşt ewkêł waran
şikûfey serçił şekerçey daran
gułpaş, gułřêz, guł bezirkaran
yexpaş, yexben, bełaẍ baxan
şenyar xerman selc ser daxan
qedîm qerawił êłçî «nûřê» deşt
berdul’ecûz ker wardî beheşt
qibley muştaqan, mayey bereket
je key qible we baz ker ḧereket
le deşt û daman, kwan û gêłgeşt
bidemin şemîm xak necef řeşt
řix mał we me’cer řûy řewzey ḧerem
wew zerîḧ bû mişk şay saḧêbkerem
jew dyar wergerd wey wiłatewe
wey ka û kwan xom xiłatewe
dem bidem weban berzîy bayran
cewłange û cêgey weḧşî wayran
sertaser zemîn, deştan weştan
tar ’enkebût baf taftey řûy ketan
kûrey gułałan kûlîdey ḧûrdan
saf bîyen je dest muẍeylan zerdan
tiłîfey têjaw taf derwînan
meyl besten je mil mînagerdenan
manû we seray sirnî û tûzerî
mer cełay ceřar cengicûy cewherî
text pa çemen, pak tełakarî
çemen çwî lerzan mak mirwarî
malan we meqam musîqa matin
mûran hemtezar, gişt çemeřatin
ye çi fikirêwen ne nezer darî?
zar zemînen bê tû ne xwarî
mer sabiq sałan je yadit çîyen?
kelebad îmsał firyadit nîyen
bûrê we ḧacetê qiblegay ḧacat
wextê ward bîyen werje munacat
peyapey paçey paherdan tey ker
zihûr ziqum zimsan pey ker
hem bûrêwe çwî herdecaran
we îmdad mewc meter weharan
kawan kul ḧesret tûşan ha ne dił
şayet werdaren ser je xak û gil
newrûz guł hêman ẍeltan we xaken
jey cehet camey cergiş çakçaken
cay sûsen hîç ca dyarî nîyen
we textey yexben ḧisarîy bîyen
esrîn nesrîn, nesrîn newerde
řayeḧey řeyḧan şewnim perwerde
sûz ser çîman xezał tê çerde
seḧin kafûrî pûşan çwî perde
bał beřeza çetir çwîran
simsa, mefra, merte’ swîran
şewq şeqayq, zerdîy zenbeq guł
gułřêzan guł, çehçehey bułbuł
girdîy gułałan bû çwî qerenfił
temamî tasey tûşan ha ne dił
ta key mucawir miłk damanî
xeftey xak pak cay îmamanî
jew wexte ke bad xezanxêz xêza
pey ’ezim xaret xezan wirêza
şeş mange merdum we şeşder matin
je cewr deycûr giştyan kişmatin
dey sed řeng cewşen cûyay ceng řenen
sebeq je sikîn sewhan sa senen
pirîşey pirşing şîr mêw mîwe
şems xawer şewq hwer bîyen lêwe
nexił nimayan nû xêzan nû
beqawşecer kişmîrî ajû
narinc narben, řuman, řuteb
duḧetuřuteb, zînetuḧeteb
gîz û guł ercen, gwêj û ewgezû
twî we twî deře, řimle û řezû
xelîf û xeyme, xezałey xweşbû
’elef erwan, erxewan zû
bał we şeftałû, şen û den û dax
je cewr zihûr zimherîr duřsaq
beyû mîwedar, semer çwîn xase
çeng westen je dest řêze ełmase
hefit řûj menen hwer çûde birc ḧût
berdu’ecûz kîyen we yaney yaqût
je cehd cereng cehd sulc serd
yem kerden we yas, yem bwan wiyerd
mirx zeřîn bał ha ne birc qews
qews berden we gyan gyaneweran tews
ha birc axir întihay qewse
ey řûje zihûr zuqumey pewse
hefit řûj menen çû we birc mahî
aw le kûsaran řahî bû řahî
weḧiş û teyr û cin, mel û mar û mûr
bałdar û bêbał, zûrdar û bêzûr
çemdar û bêçem, çemeřay řaten
’alem muntezir nefxey nicaten
kelebad herçen tû ḧeqê darî
nizîk ew ke’bey perwerdigarî
dił je xak pak ke’be nemenî
bełê emanet ba we car henî
çwî bad şurtey kiştî kîş yem
zewreqnişînan derarî je xem
şemał bexiş ew şay şayan nicatder
řazqumerzûq meḧbûbubeşer
esedułła ’erş er ’alem ẍałb
zahîr pêş maçan bin ebîtalbKes
ḧeq ew zamad eḧmed muxtarKes
ḧars serîr ewc îftixar
kelebad hanay baw bider ew kaw
twîłedrextan bêdar ker je xaw
hem we zewc zułf zaray binit ew
qemer je şewqiş medrewşû we şew
we du gûşwarey heftem ’erşe
çwargûşey gerdûn jêşan nwîrbexşe
we ḧeq penc ten al ’ebayîn
eyîmey ’îzam bû ’eşer îsneyîn
je miłk daman bazhem axêz ker
ceng yexbenan ełmaseřêz ker
burqi’ kafûrîy kwan pare ker
texte yex ne řûy yem aware ker
wew heyheybizen hełate newerd
wew ẍurişt ře’d hejberan zerd
wew teyûm te’im, tiłîfey tûfit
wew şiney şewnim şecer şikûfit
şew çepawił xan deycûr ne xaw ker
zerf zurûfat mîna çepaw ker
îse xan dey ne ẍafił xawe
kelebad hanay wext çepawe
wext suřna, kûs û neqarewe
hem we ře’diberq atşiparewe
dey ne řûy dunya sedhezar senger
weser kiławan saxten senger
senger we senger samanş sa ker
cêgey sengerş we sûsen ca ker
şewexwên wêney serdar řey ker
xeymey xezewş weban ney ker
xeymey ebyeziş kul bêqîmet ker
senger we senger sulc hezîmet der
seḧra û serzemîn weyek ca saf ker
kwan û kawan gişt xezrabaf ker
sew sidat beyû weser kiławan
ajîr ker aşûy kemend kawan
twîz û te’im yekser je zemîn bar ker
bar xem je qełb xemdaran tar ker
hem řûḧ řebî’ jenû taze ker
sewzîy ser çîman bê enaze ker
bułbułan je şewq gułan şeyda ker
gułan je diłey guł huweyda ker
şemał turkemîrNasnava edebî dexîlen we tû
řûy murac’et baz bikeyn jenû