şemał le bextim
Li pirtûka:
Dîwanî Mîne Caf
Berhema:
Mîne Caf (1911-1965)
2 Xulek
464 Dîtin
şemał le bextim ...
şemał sa beyo îmşew le bextim
îmşew diłsoz be bawe serwextim
we nasor keftey zamanî sextim
îmşew ba we seyr zamanî karîm
goş der we nałey derûn ewgarîm
bay û bwîne tu ḧałekey min
boy kizey derûn zûxałekey min
fîday sirwet bam peykî seḧer xêz
îmşew çemanit biker surmeřêz
horêzo îmşew ce wadey seḧer
wêt ’ebîrîn ker we ’etir û ’ember
buyer we tacîl ne ser kosaran
meker we direng to ce dyaran
ta meyo we řat kosar û herdê
herdêwen hewaş deway gişt derdê
ne toy ew herda mewînî we çem
hewarî sefaş çun baẍçey îrem
her wext to yaway wew şwên heware
xêł xaney qîblem we nît dyare
buyer yek yek ce syamałan
serḧed nişîn şay mawî xałan
wêş çun delîley ẍezal çînen
daym çun ahû serḧed nişînen
ne berz hewarê xeymeş pa kerden
wêş wêney ahû mayl we herden
biker zyaret dewrî yanekeş
çun ke’ben ce lay min asanekeş
ce dumay erkan tewafî yaneş
buyer ce mabeyn perdey asaneş
bişo we xizmet ew newnemame
ew terlan tewaw qumrî xerame
waçe qîblekem sewłî semen ber
bałagêřit bo wiłgey hefit kîşwer
min kyanan we lat zamarekey wêt
we kizey hîcran ewgarekey wêt
’erziş hen ce lat er pirsen eḧwał
we şeray dûrî byen we zûxał
nemenden taqet twanaş nyen
hoş û ’eqił û fam, ce laş berşyen
ne quwey řeftar hêzî amaşen
ne sewr û sikûn nîştenî caşen
sato we kerem diłnewazîş ker
ce řagey hîmmet dewa sazîş ker
tay ne ew tuřey syay ’ember bo
bikyanwî perêş bel we dewaş bo
twanaş mebo ew ce îşaret
meyo asanet medo zyaret
ce dûr bwîno yaneket we çem
we wêney mîneNasnava edebî şad mebo bêxem