ey dił kota ker zayełe û wey wey
Li pirtûka:
Dîwanî Mîne Caf
Berhema:
Mîne Caf (1911-1965)
3 Xulek
652 Dîtin
ey dił kota ker zayełe û wey wey
wes kero zarî û şîwen heta key
êden dyarda xêł xaney cafan
ama tilmît bar muşkîn kiłafan
ama ahûkey tûnî herdey dił
çem syawekey ser delîley geł
nazarî ser ’êl ama we hewar
qedîm hewargeş kerden we gułzar
ew wiłke û mekan dił meda we hem
îste medo řeng guł baxçey îrem
megêłûn we naz dîde xumaran
byen we maway nazk nazdaran
ew herde û wiłat gyan mawerd we teng
sefaş medo řeng bay text fereng
nyen twanam bigîrom qerar
êden qîblekem aman we hewar
toyş pey wêt weş ber dumay xemanen
cařûkeş ker hem şadî mîhmanen
sařêş mebo zam dûrîy bałakeş
pey dewa kafyen gerdî pałakeş
îmcar we taqîq xem ne zewałen
hicran aluda’Erebî wadey wîsałen
waçe we xeman kełek şêwnan
şadî nobeşen wadey wesił aman
biker tedarek esasey sefer
perê hedyey xas tu gyan ḧazir ker
tacîl ker dêren bişîm we řawe
bwaçêm we dem ḧemd û senawe
weş amay we xeyr gułbaẍî baẍim
weş amay we xeyr keyf û demaẍim
weş amay we xeyr nûrî çemanim
weş amay we xeyr deway zamanim
weş amay we xeyr tawwisî gułşen
er hey weş amay ahûkey xuten
qîblem weş amay warget barîk bo
řûy bedkar çun tay zułifit tarîk bo
duşmin xem xełat dost azad bo
xwêşanit daym çun wêt diłşad bo
waçe qîblekem yeřay îmanen
pey çêş ye qanûn ehlî wîcdanen
wêt meşẍûł we seyr we êłaxewe
min ce germesêr axu û daxewe
sûçyay sebûn şerer êş û derd
gîrodey xeman dił ewgar, řeng zerd
şewan ta we řo xem hemřazim bû
zayełey derûn seday sazim bû
neway ney nałey diłey piř derdim
teskînim demey henasey serdim
wefrawim hunaw zamî karî bû
xorakim kebab dił ewgarî bû
şerawim şûraw dîdey esrîn bar
neway ney kizey ciger suzay nar
mawa û mekanim we herdanewe
megêłam we êş we derdanewe
çun qeys ’ewdał bê zeyd û mawa
mwanam î ferd sub ta xor’awa
qîblem to ne seyr sefay kosaran
hîç nyen yadit ce dił ewgaran
wey tewr da cwaw şoxî şêwa şem
nazarî serxêł peřey guł we dem
herkes we meylî leylê dił keyl bo
mebo ew mecnûn herdey duceyl bo
mebo çun ’ewdał kełbûs we koł bo
dêwane asa cakeş neçoł bo
we daym zedey zamî hicran bo
hamřaziş nałe û şîn û giryan bo
xorakiş kebab dił ewgarî bo
wefrawiş hunaw zamî karî bo
leyl mebo çun leyl bişo we êłax
’aşiq çun mecnûn suçnyo we dax
řewyey nazaran sefa û seyranen
pîşey ’aşiqan hana û giryanen
herkes we ’eşq bałam ’ewdał bo
mebo çun mîneNasnava edebî we koy zûxał bo