şemał amanen
Li pirtûka:
Dîwanî Mîne Caf
Berhema:
Mîne Caf (1911-1965)
2 Xulek
514 Dîtin
şemał amanen ...
şemał fîdat bam dîsan amanen
dîsan dił we êş dûrî ser dagen
ce herdey derûn ahir wer dagen
dîsan dił we êş hîcran biryanen
çun qeqnes we nar ḧesret giryanen
hamsakey qedîm ẍemekey caran
serdagen lêman ce dûrî yaran
er persî çêşen şemał fîdat bam
we fîday sirwey sub seḧergat bam
êden amagen we menziłgey wêş
bîyen we hamřaz ewgarî dił řêş
kem kem toy derûn kerden we xûnaw
çemanim řêznon esrîn çun hûnaw
tik tik metkyo zûxaw ne cergim
wexten we qabîz bisparo mergim
we biłêsey nar dûrîy bałay yar
giřgiř megryo dił çun pîredar
ercûm her êden şemał fîdat bam
we fîday sirwey sub seḧergat bam
kerdim min xwênî desewdamanim
we tûm deẍalet bider amanim
buyer ey su ne ser kosaran
wêt ’ebîrîn ker ce toy gułzaran
we boy mişkî xas gułbaẍî baẍî
’ebîr amêz ker ne toy demaẍî
we sirwekey wêt mexłût we guław
bido ne demaẍ qîbley min ce xaw
bişano kem kem egrîcey çîn çîn
bida ne gonaş ce xawî şîrîn
bel we sirwey to şinoy zułfî ew
bêdar ken dîdey azîz gyan ce xew
wextê wey teqrîw ew şox û şenge
ama ne xewda ew gułbaẍ řenge
ey arî ḧesret êş û firaqiş
wa taqen taqit pey ebroy taqiş
ey ’erz eḧwał ey êş dûrî
ey sizay zaman sext mehcûrî
ey qirçey zaman dił şerarey dił
ey řenc û xefet dûrî cemîn guł
ey biłêsey nar şerarey derûn
ey seylî esrîn dîdey piř ce hûn
ey dûy henasey we xem perwerdem
ey qirçey zaman dił we hûn kerdem
ey êş û xefet hana we daxo
wey řeng bermeyo ce toy demaxo
’erz ker ḧałekey mîneNasnava edebîy dił xemîn
to ew şazadey syamał nişîn