kiçî beyan

min ełêm:
pepûleyek fiřî be bałî sewz û sûrewe
min ełêm:
gułê be dem şiney şemałewe bizey bizût
to ełêy:
çi bû pepûleyek fiřî
ya ne sûreguł, zerde kewte lêwî naskî
min ełêm:
heta hetaye dewrî cwanîye
emřo ger hetaw kesîreye nemawe agir û giřî
mêrgî asman be sûtmanî hewrî lokeyî nezok
piř le xał û qopene
cengełê ke cêjwanî pole pořî bařîye
cêge mołî kemtyar û gurg û řêwîye
şořebî ke bote darî çakî bê neşe û şine
zelke ger teyarî têr û qoşene
xoşewîstekem
le pencerey nîwetakî bûmelêłewe
çawî min le dîmenî kiçî beyanîye
le ḧencerey zemanewe
gwêm le zemzemey zułałî xîze wirdekanî kanîye.
basî şew meke ne şayerî şewm
basî xew meke lelay humêdêkewe fêre ser řewm
bew demet ke bonî sed beharî lêwe dê
bonî deştî bextyarî baweşî çyay, bedestî ba
be guł çinawî, lêwe dê
bonî sersekoy be kagłî, be awpijawî, lêwe dê
pêm mełê ke dakewm
pêm mełê ke ałî załî şew, çawî bêxewî çiře
pêm mełê nehatnewe ewey ke çûn
megrî bo xesarî bê geřanewe
řêgeman dûr û sext û qaqře
xoşewîstekem
ême nwênerî xebatî řojhełat
řojhełatî sûrî agirîn
fêr nebûyn bezîn û dabezîn
řanehatuwe
çawî qaremanî kurd
be şewnimî girîn
xoşewîstekem
le pencerey nîwetakî bûmelêłewe
çawî min le dîmenî kiçî beyanîye
le ḧencerey zemanewe
gwêm le zemzemey zułałî xîze wirdekanî kanîye