micils arastin nifis amare û çigungî xiruciş be aqlîm gîrî
Li pirtûka:
Komele Şîrî Feqê Qadirî Hemewend
Berhema:
Feqê Qadrî Hemewend (1830-1890)
4 Xulek
727 Dîtin
ey dił sa dîdey ’îbret ker guşad
dastan ce mułk wicûd biker yad
ce şah řusul weytewr xeberen
muḧarebey nefis ’ezay ekberen
yek řo nîşt ne text nefis xudpesen
çun şahan key saza encumen
wepa kerd direfiş bilûẍ be şîtab
araste kerd bezim ce xeymey şebab
muẍennîy le’ûb bestey şirûrî
jendiş meqamat mestî û meẍrûrî
da ne kelley ser tac ḧîle û fen
xerqey dûřûyî poşa we beden
çerx řeqqasan ce bezim ulfet
da ne çeqaney ẍeybet û tuhmet
dewrey saqîyan bê řenc û te’eb
bexşan badey buẍiz mezey lehu û le’b
kemançey hewa semtûr hewes
betûl emel ama be nefes
horêzawe pa derdem ezazîl
sucde berd ne pay textiş be te’cîl
watiş padşam dunyat bo be kam
text û tac to baqî bo ne ’am
êden nyazim ce dergay ’alî
çun her kemałê daro zewalî
êden teqazay gerdûn hewa
esbab dunya nedaro wefa
herga weytewren hîç mekêşe ẍem
guşad ker qapîy ’uşret demadem
cem ker sîlsîley supay bê endêş
firseten pey defi’ ’edûy bed’endêş
be îqlîm gîrî hîç meker dirêẍ
binyad ’edû berawer ce bêx
pêşînan waten pey pey merd berkoş
bipoş û binoş, bigîr û bibexiş
ba ce dimay merg nemano ḧesret
qyam ker pey bezim mesrûrîy ’uşret
sa’îy min lwan pey her îqlîmat
ce her merz û bûm senden me’lûmat
ce şahan dewr nemenden taqet
herkes ne cay wêş nîşten feraẍet
tełeb ker weber meyo elxennas
teslîm ker weneş supay bêqyas
ewweł mułk şer’ bawero be dest
ewsa pey îqlîm henî kero qest
şah xudpesend derdem xiroşa
pey tesxîr mułk berg şeř poşa
xêza ce meclîs bezim hengame
pey cem’ leşker nwîsaş name
namey her teref yawnan be mor
daşan be çapar, řahî bê zerûr
hem pey elxennas name bî înşa
be wirûrd ferman wêt çenî supa
er řo yawa pêt, er şew deycûr
negêrî aram pey bezim ḧuzûr
tey kerdin menził çapar be dewan
heryek be meqsed wi’degah yawan
her serdar sext ne her mawa bê
saḧêb bezim û řezim san wisupa bî
herkesê cem kerd supay wêş temam
derdem řahî bîn bê sebir û aram
elxennas şûm yawa pêş name
cem kerd sîlsîley supay nedame
swar bî be esp dewendey têzřew
ne we řo aram ne şew şî ne xew
supay sê îqlîm be we’dey sê mah
yekser ḧezir bîn ce ḧuzûr şah
ce kenar şehir supay piř fusûn
wepa kerdin çetir xeymey nîlîgûn
sułtan ’enîd swar bî be zîn
yasał da qişûn ne řûy serzemîn
serdaran sext tełeb kerd weber
elxennas ce pêş demax mest şeř
fermaş elxennas toy saḧêb ’elem
çun xor huweydan merdît ce ’alem
çun tonî serdar supay kînexwa
er îmcar namey fetiḧit pêm yawa
megêrî pey wêt umûr ḧîkmet
hem tac şahî, text sełtenet
serdaran ce lat saḧêb ḧurmet bo
heryekê be qedir wêş be ḧurmet bo
germ ker ulfet ba supa û guro
hîçkes nedestit neyo be sito
baqî dilêran ney hengamey kar
şeca’ey wêşan herkes kerd îzhar
mepoşo xel’et meyawan be kam
megêran řutbe ce ’alî meqam
serdaran yek yek aman be sucûd
kerdişan senay sułtan merdûd
watin be îqbał cemşîd cem ca
tonî xudawend ême canfîda
ta sułtan ne text nîşten diłguşad
yekser be emirş ser medeym we bad
şa derdim ferma ḧazir bî gencûr
bexşa zeř û sîm be supay piřşor