giftar dir ’ilamat ayman
Li pirtûka:
Komele Şîrî Feqê Qadirî Hemewend
Berhema:
Feqê Qadrî Hemewend (1830-1890)
2 Xulek
721 Dîtin
pencen nîşaney terîq huda
dił nerim û çem teř, nefret ce dinya
hem şermendegî û kotahîy emel
her pencen sîfet ḧemîdey ’emel
hem penc sîfeten quwey şeqawet:
diłsext û çem xuşk, be dinya řeẍbet
hem tûl emel hem bêḧeyayî
her pencen delîl pey eşqyayî
wey tewren umûr ḧeyyî dawerî
posen teqazay sînf beşerî
îradey teqdîr zat subḧanen
îqlîm wicûd cay îmtîḧanen
pey êd îcad kerd meḧek dinya
ta esmay sîfat wêş ko hweyda
hem zułmet û nûr, hem kufir û îman
mewcûden her çwar ne zerf însan
kufir îblîs û nefis zułmet numa
nûr ’eqił perê îman řehnuma
er şe’şe’ey nûr îman kerd řewşen
zułmet numay kufir bermeşo ce ten
ewsa lutif ḧeq cewkes hweydan
ce qelbiş kunûz ledunnî peydan
er nûr xamoş bo zułmet muqîmen
ewkese muqîm nar ceḧîmen
er mwazîn bî zułmet çenî nûr
’efûş te’lîqen be lutfî ẍefûr
eger zyad bî sewabiş ce zenb
me’fuwen herçend mebîno te’eb
esiłş her êden ce umûr kar
nêk û bed ce nas mebo aşkar
be mîzan şer’ yaran teqî
me’lûmen efkar se’îd û şeqî
herçende tewfîq ce zat ḧeqqen
karan ce qudret ḧeyyî mutłeqen
emma to be emir şer’ bît mwafîq
delîlen zihûr asar tewfîq