mîwanîkirdinî xurşîd şazade û yaranî û noş aferîn û xatûney perî
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
7 Xulek
755 Dîtin
sub seḧer xurşîd ber’ama ne ca
bêdar bî ne xaw şay ḧorî leqa
ferma becergey fêrqey kenîzan
nazk new hałan pol pol ’ezîzan
îmşew şazade meyo mêhmanî
tertîb bikeran baẍ řizwanî
piř sefa û zînet bideran cela
binmano nereng fêrdews e’la
medaxił keran bereyḧan û guł
řewneq bido şewq be arezûy dił
şerab le’il fam şîşey dû sałe
saqîy guł ’uzar bade û pyałe
mutrêb beneway soz û sazewe
řeqasan we řeqis xoş awazewe
seday zîl û bem awaz çil çeng
bigêron bedest herkes beyek řeng
esbab bisazan ba nesemay şam
mêhmanî keran saqî û bade û cam
bew tewr bisazan yaran bo xecił
giriftarş bo diłê nesed dił
fermanberdaran şay şîrîn kelam
ta şam tedarek kerdin ser’encam
xurşîd ’ałem şay şîrîn leqa
nîştebî benaz dîd û dił nera
dîde întîzar dîdar yaran
beser we’dey wêş gird teşrîf baran
* cew teref ẍembar şazadey diłrêş
horêza pey bezim we’dey yarwêş
mah zeř’efşan hem noş aferîn
xatûney perî nazar şîrîn
xan miḧemed çenî ḧemîd melaḧ
wêşan dirust kerd bewe’dey selaḧ
kûçe be kûçe daye berdişan
daxił betoy baẍ dułber kerdişan
şay nazenînan şox şîrîn xał
horêza neca kerdiş îstîqbał
yek dest ’emaret cařûdey diłkeş
kul neqaşî bend çun şu’ley ateş
çinaran berz ser ne’erş mała
nemaman şox zeř estûn bała
zemzemey murẍan nałey kebûter
nîşten begerdûn ey çerx exzer
qumryan we bang gułbang yaho
bułbułan bedeng nałîn bê şo
murẍan xoşxiwan beřûy şaxewe
tawis ne sehend sebiz baxewe
şimşadan saf narinc û lîmo
enar û encîr, engûr û emro
mîwey řengawreng heryek ne darê
layeqen be baẍ gişt şehryarê
wenewşey weşbo saway sunbilan
ber’aman çun lûl zułf nazaran
ḧewzan zułał çun ab kewser
şîrîn û şewbo yek ne yek xaster
pexiş mebo we ban berdan meřmeř
wêney daney duř yaqût û eḧmer
ne goşey ew ḧewz saf meřmeřî
textî arasten belqîsay perî
pay textiş girten mubtełay ała
çend dane û gewher nyan we bała
duř û cewahêr yaqût û mercan
pîroze û sîmîn, le’il bedexşan
bend kerden ustad xasey dyarî
binmanon ne dewr pey yadgarî
etłes û xara ferş wisten we ban
perê caygay xurşîd taban
* nedewran text tûtîy şekerřaz
deng medo we hem bułbuł çenî qaz
tawis û borçîn, sersewz nerûy ab
dił ne derûnda mekerd we kebab
ey saz û řaze temamî temam
mewcûden nebaẍ sewł naz’endam
yaran ke dîşan ey qesir û ey baẍ
řeng řeng megřyo bewêney çiraẍ
tewasan newca satê bîn sersam
ney qesir û ney baẍ şox cemîn cam
newqesir, camřêz xurşîd taban
wêney leng û lał bê deng bê ziban
xurşîd ’ałem nazar dułber
zana nemenden famşan neser
cenew tewazu’ îkiram kerdişan
yek be yek we ban text awerdişan
ferma kenîzan şeyday şox şeng
meḧbûb meḧbûban nazar fereng
baweran daney cewahêr û zeř
le’il bedexşan ’ebîr û ’enber
nêsar bałay nazenînan kerd
řewyey te’aruf çenî yaran kerd
dimay newaziş şox şîrîn xo
ferma saqyan letîf diłco
řeqasan belenc mutirban benaz
xoşxiwanan besoz gułbang awaz
saqî be şîşey bade û camewe
mutrêb be ẍemzey xoş xeramewe
řeqasan bereqis ziřey çeqane
megêłan be şewq beşadmane
meşẍûł bîn herkes bekar wêşan
mutrêb be sazan řeqasan kêşan
saqyan seyr badey mey bekef
midran bê mezaq sermestan sef
ta sifîdey subiḧ ey sazuraz bî
seday kemançey berbet û saz bî
xulase şîrîn şay şeker guftar
bezmê bey destûr awerd pedîdar
hîç kes newaço we ey şahane
nîyen neşumar dewru zemane
ne řûy semawat ḧeyran bî melek
ziřey řeqas bî ne çwarem felek
noşanoş cam, kizey soz saz
gułbang noş bad, zîłey neway saz
ře’na mehweşan sermest bade
serxiweş bîn yekser şah û şazade
ce mezey girmey mest badenoş
berşî celaşan yekser ’eqił û hoş
* gişt aman be řeqis neşoxîy demaẍ
meberdin nedił zehir çenî daẍ
řeqis kerdin zemîn belerze awerd
ḧorî ce gułzar îrem xecił kerd
şazade û yaran gişt ḧeyran bîn pêş
ce řeqis řeqas mutrêb diłkêş
gişt ḧeyranş bîn be canfişanî
bedił mekerdin aferîn xwanî
ce saz û suḧbet mah qeseb poş
ḧeyran bîn yekser be dił bîn bê hoş
sa weqtê yaran yekser bîn bê hoş
befirset zana nazar lał poş
dû dest negerden şazade awerd
wêş piştan be tûł seru bałaş kerd
dest kerd negerden bo nya neboş
awerd be nezdîk guł baẍçey lîmoş
wêney diłsozan girtiş ne aẍoş
fişaraş nerûy sîney ’enberboş
şazade ke dîş xurşîd ’ałem
wêney lam û elf pêçyan we hem
herû şîn nexaw ta řewşenîy řoz
şazade çenî mah dił’efroz
seḧer beferman bînay layezał
ber’ama neburc şems zeřîn bał
herdû horêzan nexaw şîrîn
poşan webała camey ’enberîn
xurşîd ’ałem celay cemał da
qetrey guł guław kerd be řuxsarda
şistuşû kerdiş řuxsar gułzar
řewneq da şêwey şox şîrîn war
xatûney perî hem noş aferîn
mah zeř’efşan gîsû ’enberîn
ewan hem nexaw mestî bîn bêdar
şistuşû kerdin gułbaẍçey řuxsar
şazade watiş xatûney nazdar
berşîn ne eywan şox xatirdar
bişîn be menził binîşîn beşad
bê ẍem û hîcran bexatir guşad
xurşîd dułber be îxlas xas
ceyaran kerdiş xeylê îltîmas
we’de bo her şew ce new şazade
beyûn be serwext ey cam û bade
şazade řaziş qebûł kerd bedił
xurşîd horêza lwa be menził
kerdin be ’adet gişt şew ce menził
meşîn be meclîs xurşîd çun guł
ta axir şîrîn nazdar fereng
nîşt we ban text neqaş gułřeng
meşẍûł bî bekar padşahîy wêş
ehil fereng şar şad bîn we pêş
gişt řo şazade meşî beselam
webaregay şox şay şîrîn kelam
* şew meşî webezim nazar diłsoz
ce mey xurden bîn ta nezdîk řoz
xulasey kelam ta we’dey hefit ma
ye kirdarş bî şay ḧorî leqa
’eyş kerd be ’eyn be demax dił
meşẍûł ’eyş û noş ta hefit mah kamił