řizgarkirdinî noş aferîn û bêçûy řux lelayen meymûne xatûnewe
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
9 Xulek
492 Dîtin
xanay qubadîNasnava edebî ḧekak werîn
waçe zelîlî şay noş aferîn
erê pîre çerx îne karten
îne şerit û şon řozgarten
şabaz şoxê çun noş aferîn
mederî bedest dêwan le’în
nekeç řeftarî şermê nîyen pêt
xecałet nimewî to we kirdey wêt
dêw bedsirşit ẍezeb kerd nekar
hersê hewada pey şerarey nar
naga beteqdîr padşay bê çun
peydabî derdem meymûne xatûn
ce hewa zana noş aferînen
zebûn û zelîl dest le’înen
wêş yawna pêş dest da ne bahoş
řeha kerd ce nar mah qeseb boş
perê beçegan hem ḧemłe kerdiş
herdû ce ahîr xeylê dûr kerdiş
nîga kerd zelẍem dêw syabext
ama perêşan we te’cîl û cext
naga peyda bî murẍ diłguzîn
şazade awerd ew ce serzemîn
şêr diławer zelẍem dî ne dûr
pey yaran meşo te’cîl bezerûr
dest berd pey şimşêr şêr zeberdest
wêş yawna pêş řay gurêziş best
da we kemerbend dêw bedsirşit
kerdiş be dûnîm ta kemergay pişt
ne’rete pêka dêw bednejad
řuḧiş be malîk cehenem bî şad
şazade, zelẍem wist netwî ateş
suzna temam ew dêw řûřeş
meymûne xatûn zułfan ’enberîn
nîga kerd xeylê be noş aferîn
dîş neḧeraret ateş bê hoşen
wêney bê řoḧan daym xamoşen
* watiş şazade dił mawer weẍem
noş aferîn wenezd xom bem
* nya weřûy text řû we bała kerd
ta begułistan řewzey îrem berd
* hem textê ama ce newî peyda
têda nîştebê wêney padşa
şazade wat řux ey text zeřkar
kên neser text girtenş qerar
dyaren buzurg ’ezîm şanen
perîy serweren wa lêm ’eyanen
wat ’ebdureḧman ’alî mekanen
padşay buzurg şay perîyanen
meymûne xatûn hem kinaçe şen
noş aferînş berden wegułşen
şazade şineft şî we pêşwaziş
hem şa çenî ew kerdiş newaziş
watiş weş amay ey berguzîde
xak qedemgat we banin dîde
xatirit cem bo ce noş aferîn
meymûne xatûn berden wegułçîn
mekero deway defi’ bê hoşî
berşo neferqiş mayey xamoşî
şa wat şazade nûr her dû çem
babşîn we seyr guł baẍçey îrem
bikerîn seyran řewneq nimay guł
bikerîn sefay řeyḧan û sunbuł
befermûdey şa textêşan awerd
şazade û yaran sewar text kerd
şîn we gułistan girtişan qerar
perîyan aman be hezar hezar
zeř û cewahêr awerdin webar
ce řûy şazade kirdişan nîsar
ce dewłet sera girdişan aram
ce řenc řahan řaḧet bîn temam
meymûne xatûn şox diłpesend
peyda kerd ḧekîm danay hunermend
cey werter ḧekîm baẍçey îrem bî
wêney ew ḧekîm ce ’ałem kem bî
xatûn wat ḧekîm nadrey werîn
zû biker deway şay noş aferîn
to biker deway defi’ bê hoşî
ne serş berşo mayey xamoşî
her çê mewazî ce mał dunya
ce genc û gewher ta bo muheya
mederûm pendit saherçê berî
bełam be şertê zû ’îlac, kerî
ḧekîm wat xanim we ban dîde
bendey fermanim çun zeř xerîde
înşeła aro ta wadey êwar
mekerûm deway derd ey nazdar
kenîzan ce baẍ guł awerdişan
herçiwar etraf beguł tendişan
perîyan aman coq coq û fewc fewc
cedewr ew nazar yekser bîyen mewc
xatûne xanim nazar bêgerd
şay noş aferîn gułab řêz kerd
ta we sê se’at sewł nazperwer
kerdişan deway bê hoşîy dułber
naga çem hordaşt şay noş aferîn
wîş dî hace baẍ şîrîn řengîn
dîş nîşten celaş perîyan sef sef
heryek destey guł řeyḧan nerûy kef
meymûne xatûn ha ce serîş
merêzno guław ne řûy cemînş
perî gişt be ’am bîn giriftarş
pey pey mebosan gonay gułnarş
noş aferîn wat xatûne şîrîn
to çun yawnay min wey serzemîn
meymûne xatûn guzeştey kirdar
beyan kerd perê şîrîn nazdar
ce new persawe şazadey diłřêş
îse ceko bo çêş ama bo pêş
wat xofit nebo şox şîrîn řaz
ha neřûy meclîs nîşten be ê’zaz
ew şew be suḧbet ta sifîdey řoz
çenî nazaran şox diłfiroz
perî tełeb kerd deste be deste
wêney ẍunçey guł ce gułçîn řeste
wat îmşew meşyo karê bisazan
îrem çun beheşt berîn biřazan
perîyan be ferman padşay wêşan
lwan tedarek îrem kerdişan
piř sefa û zînet kerdişan bey tewr
hîç kes nedîden nedewran dewr
cay te’rîf nîyen waçe bey şêwe
îrem nam wêş hamebo pêwe
şay noş aferîn ew be xoş demaẍ
berdişan daxił kerdişan be baẍ
nyaşan we ban kursî zeřnîgar
çun xurşîd ne burc mahî girt qerar
xatûne xanim nazar bêgerd
lwa be menził şazade biberd
’erz kerd fîdat bam şazadey ekirem
babşîn weseyr gułbaẍçey îrem
şay noş aferîn intîzarten
perî ḧesretmend be dîdarten
sa ke êd şineft şazadey serwer
horêza ne ca bewr hunerwer
daxił bîn webaẍ gułbaẍçey îrem
besoz û besaz seday zîl û bem
perîyan çendê gewher awerdin
nêsar bałay şazade kerdin
sułtan şî we ban text zeřînş
ce lay dest řast noş aferînş
saqî şox şeng badey mey bedest
keşîde ře’na şox dîde mest
ew şew ta seḧer xurşîd ber’ama
meclîs girtişan cedewran şa
meymûne xatûn şîrîn bê gerd
řewyey buzurgî hem beca awerd
* ewend xidmet ker ce nendaze řed
ta çil řoj temam merexes nekerd
ce dimay çil řoj yad weten kerd
teşrîf be ḧuzûr şay perîyan berd
cerûy buzirgî řuxset bider pêm
ta şom be weten mułk baboy wêm
padşay perî ama be guftar
řêza ne dîdeş gewher bexerwar
cewab da ey şêr ’ersey zemane
hîç ḧerfim nîyen mawer behane
bełê yek ḧerfê zibanim besten
’eyben pey şahan îqrar şikesten
ce dergay dawer danay kirdigar
we yeqîn dił kerdenim îqrar
herkes telîsmat dêw bido şikest
xatûne perî bawero bedest
seringûn kero ew dêwe ẍułe
xerab kero kax mułk zengułe
çenê tedarek te’rîf nebo pêm
mederûm peneş min kinaçey wêm
êste ey fetḧe bemerdî kerdî
kina çem nekax dêwan awerdî
îstid’am êden îse ey ferzend
xatûne pey to bikerûm peywend
mayl bedîdar şem’ dîdet bo
bewêney kenîz carûkeşt bo
şazade watiş ey şah serwer
min ẍułam tom ce bende kemter
lutifit kamłen řazit dirusten
minîç yek ḧerfê zubanim besten
be noş aferîn îqrarim kerden
beyeqîn dił sewgendim werden
heta neçînim gułzar baẍiş
nenîşûm we ban şem’ çiraẍiş
xeyał řûy kes nekerûm hewes
çem guşad nekem bedîdar kes
watiş ey ferzend ’eybê nedaro
bełê yek ḧerfê mewaçûm weto
êden metłebim çun yaway we zeyd
awerdî we dest ew cemîn xurşîd
cew dima nazdar xatûn biberî
be demaẍ şewq nîkaḧiş kerî
şazade dilêr qebûł kerd řaziş
wat mekem řoḧim we payendaziş
şah û şazade îqrarê kerdin
be sîẍey kelam sewgendê werdin
padşa ferma dû text awerdin
bedest şazade û yaran siperdin
şa ferma dêwan textişan hordaşt
nezer be weten şarçîn gumaşt
meymûne xatûn nazar dułber
ama ta muḧît deryay eskender
baz hem gêławe şox xatir řêş
řû kerd be mesken mułk baboy wêş
dêwan tey kerdin řagey piř asîb
yaran yawnan bekoy ser’endîb
dêwan watin şah xatirit bo şad
ye koy ser’endîb ye ademîzad
şazade şineft çun guł şikawa
nesîm çînş be meşam yawa
dêwan řuxset da text hem berdişan
řewaney gułzar îrem kerdişan
nîga kerd beçe řux ama belaş
keftin çun ẍułam wêş ne xak paş
şazade bosa seru bałşan
hem xeylê persa ce eḧwałşan
newaziş beḧub bikerd çenîşan
řuxset da lwan be maway wêşan
yawan be yaran şazadey salar
daxil bîn be cay nezdîk bîn beşar
be xan miḧemed wat şêr beçey xûnxiwar
mebo tu çabik bişî perê şar
çwar esp û çwar zîn çenî gişt esbab
dersat bawerî be te’cîl û tab
dersat horêza çun şêr şikar
perê tedarek řûkerdiş ne şar
lwa be bazar şêr hunermend
çwar esp û çwar zîn tuḧfey diłpesend
ca ke peyda kerd perê xwabga
amawe û yaran berdiş be ew ca
ce ew menziłga girtişan qerar
şay noş aferîn hem şêr xûnxiwar
newcage nîştin şew girtin aram
řaḧit bîn newca ta be weqit şam