geyştinî meymûne xatûn be małî bawkî
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
3 Xulek
616 Dîtin
meymûne xatûn şîrîn diłkêş
řû kerd be mesken mułk babwî wêş
ta we sê se’at zyater ya kem
yawa be mesken gułistan îrem
weqit ẍurub bî, tarîk îwar
daxił bî we toy qesir zeřnîgar
çun baz teřłan qoşxaney şahî
nîşt we ban yatax be diłrubahî
pîr û pîrzade zanaşan xeber
aman we pêşwaz şox xatirteř
gyan û ten kerdin we payendaziş
çun řoḧ řewan mekêşan naziş
zeř’efşan kerdin ceqewm û ce xwêş
şad bî be dîdar kenîzan wêş
pey şah babo xewer berdişan
ce kar ferzend ḧałî kerdişan
horêza ce text şah ercumend
betaw û te’cîl şî welay ferzend
bo nya weboş hetake tawa
ce şewq dîdar çun guł şikawa
watiş ey ferzend nûr dinya û dîn
çun necatit bî ce dest le’în
watiş ey babo padşay serwer
yek newcewanê şêr diławer
saḧîb yał û bał şêr ẍuřînen
ferzend ’ezîz padşay çînen
be baho çun bewr řustem dastan
cemał çun xusrew şah sermestan
’elqem fewt kerdiş cerûy derya bar
qesir suleyman kerdiş yextesar
hem delẍem dêw bezarî û ’ezab
qesir diłguşad ew kerdiş xerab
* telîsim zengołe kes pê neberd çar
cezîrey waq waq zengî ademxiwar
heqit telîsim sext zengołey napak
bezor bazû yekser kerdiş xak
min çenî nazar şay noş aferîn
ber awerd neçay ’elqem bê dîn
yekser guzarş xatûne nazar
yawna be’erz celay şehryar
şah ez nedîde ’aşiq bî berûş
be yeqîn dił kerdiş arezûş
min bew gişt sipa şikestim werden
ew tenha swar ey fetḧe kerden
wacîben pey min bikêşûm naziş
dû ferseng yibşîn hem we pêşwaziş
meymûne xatûn şîrîn nazar
wat qesem be tac cuqey şehryar
wêney ew cewan şêr yegane
nîyen ce řûy ’erz dewrey zemane
layeqen şahan cehan bê gezaf
bendey dergaş bo ceqaf tabe qaf
şa ferma dû text muheya kerdin
dersa’et pey şah û wezîr awerdin
nekerdin midar qetre dan be taw
yawan bederya bekenar aw
wextê ke dîşan şazadey çalak
hawepişt murẍ çun şêr bê bak