agadarbûnî sułtan îbrahîm le winbûnî noş aferîn
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
9 Xulek
614 Dîtin
xanay qubadî derûn piř nederd
ser lewḧey elwaḧ cedwelkarî kerd
be ḧerf řawî danayan pêş
bey destûr kerden tay řişte takêş
xamey ’etir amêz nuktey řeqem saz
bey destûr bîyen ey řaz û awaz
seḧer şazade nexaw bî bêdar
kerdiş arezûy cemał diłdar
nîga kerd be cay xwabgay dułber
dîş noş aferîn nedaro eser
ah serd kêşa be dił êşan
waçî gişt e’zaş nerîşe kêşan
xûn řêza ne çem benałey neberd
ceser ta daman yexeş pare kerd
mewat ey yawer îmcar çêş kerûm
şehbaz şeş dang neko bawerûm
murẍ tełeb kerdiş watiş ey ham derd
ye çerx gerdûn derbarem çêş kerd
hem wisten ne gêc beḧir bê saman
dîsan bekoşî sewł xeraman
řux wat şazade gyanim bo fidêt
ce yadit meyo herçend watim pêt
nekerdî qebûł ḧerf ey bende
newatim ey dêw bemekir û fende
ew nabêkare dît çi karê kerd
xuda mezano emcar be koş berd
hem dîsan cenew dêw nasewab
to wist be cefay me’rekey ’ezab
şazade nerim nerim leyl melawan
mewat ey şiş dang cergim giřtawan
wêney marangaz gułgûnen bergim
meyo ne dîdem hûnaw cergim
* (ewend melała û megrewa bezar
xan miḧemed ce xwab bułend bî bêdar)
wextê xan miḧemed bikerdiş nîgaş
horêza derdem kefit ne xak paş
watiş fîdat bam zarît pey çêşen
perêm waçe řast dił be endêşen
şazade watiş şay noş aferîn
dîsan hem berden petyarey bê dîn
xan miḧemed ejnî des kerd bezarî
diřî tabewar yexey mirwarî
watşan be murẍ mubarek nîhad
mebo hem dîsan bał bikey guşad
bigêłî seḧra derya û deşt û der
ce noş aferîn bawerî xewer
mebo bigêłî şaran be şaran
ta telîsim dêw ezreq ekwan
er narî xeber çabuk û çalak
şazade cedaẍ zû mebo helak
watiş fîdat bam şazadey xoş xo
xûbî nedaru ey zarî pey to
teyr hunermend ceno perwaz kerd
gêła îqlîmat keş û koh û herd
cengeł cengełan çend bêşey piř şûr
gêłya ḧesar hefit qaf bilûr
her çwar quley qaf herde beherde
mekan dîwan qehreman berde
(ce koy ser’endîb ta çoł kogîr
ta telîsim sext şabał bê pîr)
gêła cezîran cezîrey dem xan
hefit xwan cadûy şay maznideran
ewend ke gêła sara û deşt û der
ta mewc piř coş deryay eskender
de şeb û de řoj ce sub ta be şam
megêła bezar hefit îqlîm temam
naga nekirdar padşay cebar
cedûr da dyar telîsim dîşwar
menşûren namş zengołey dêwbend
dêwan ařasten be mekir û be fend
qwet da nebał murẍ wefadar
ta şî be ser çay zengułey dîşwar
dîş noş aferîn newca dyaren
melûl û matem zar û zigaren
nezdîk şam bî muracî’et kerd
ama we xeber perêşan awerd
řux dî cemałş keyl esrînen
zana peşêw ḧał noş aferînen
wat mizganî bo şazadey xoş xo
xeber dost xas min medûm be to
de şebane řoj nekerdenim xaw
berûy hewada be te’cîl û taw
çend wiłat gêłam çend mekan çoł
ta şîm be cayê namş bî zengoł
şay noş aferîn ha ne dilê çah
daym perê to her mekêşo ah
ha ce zengołe telîsim dêwbend
celay arayş şûm napesend
noş aferînş berden be çahê
cagey nahemwar xerabegahê
şazade şineft ḧał û guzarş
be xan miḧemed kerd xeylê sîfarş
řux dest berd perê şazadey diłřêş
nya nemabeyn herdû bał wêş
perwaz kerd neca nîşt nerûy eflak
berdiş bewmekan telîsim napak
be endek endek ama we payn
ne pay zengołe nya wezemîn
řux wat şazade bewr bê eman
řuxset bider pêm pey cage û mekan
sê peř ce mabeyn bał wêş kêşa
kerdiş sîfarş da bedest şa
her wextê muşkił hem ama we řat
binyer we ateş ḧazir bû celat
min meşûm weřa to wêt memanî
ełbet ser’encam karit mezanî
řux îne watiş řahî bî we řa
hîmetxiwahî kerd řû kerd bew dima
şazade řû kerd ne telîsim dêw
ama ne goşiş welweley ẍerîw
dîş kohê neban kohê sazyan
kes nimezano be çêş bend kiryan
xeylê xecił bî newmawa û cêda
neřaş dyar bî ne qapî û derga
dîş nerdebanê ew şêr xûn xo
nerdeban meşo ta we bałay ko
şazade newca şikofa çun guł
wat şukirim beton danay bê muşkił
be nerdebanda şî be bałay ko
xeylê nîga kerd ew şêr xun xo
* ciftê derwazey sengîn dî we çem
besêḧir û efsûn kerdenşan muḧkem
derwazey muḧkem sengîn bê saman
temam fûladen qapîy bê aman
herçend koşiş kerd nîkzadey nîk merd
ne xak qapî řah peyda nekerd
serasîme bî xakiş kerd we ser
axir bê hoş bî ne pay qapîy der
ama ne xawiş ’abêd piř hoş
watiş şazade derûn piř ne coş
horêze nexaw xuda yarten
danay zulcelal nîgadarten
bişo binîşe şazadey sermest
ce teref řast seng sifîd hest
to bişo bewca şazadey çînî
lewḧê piř nexet newca mewînî
herçê nwîsyan nerûy lewḧ zeř
se’î ker temam be ’emel baweř
êd wat ẍayb bî ’abid piř fer
şazade nexaw serkêşa we ber
belay dest řast řahî bî řewan
ta şî beser seng, te’cîl bedewan
dîş ne zîr seng yek lewḧ bêgerd
nwîsyan be ab tełay lacwerd
nwîsyan fesîḧ sułtan îbrahîm
dił be xuday wêt bibeste qaym
yaway be qapîy ey şêr xoş xo
(înşeła) qapî derkenar mebo
şêr namwer nam xuda berd
řû ne telîsim dêw mel’ûn kerd
nîga kerd qesrê besten new cêda
nîyen ne her ca nimebo peyda
baẍê dî c baẍ ’eceb gułzarê
nîyen neseray hîç şehryarê
(zace) y xusrewî ne pay serawan
meyo ceserda çeşmey ferawan
ne pay ew baẍçe çeşmey dî we çem
abiş xoşgewar çun ab zemzem
noşa ab serd řaḧetî wana
ḧemd xudawend bê ḧed kyana
cewdima dest berd ew perê beẍeł
lewḧiş ber’awerd muşkił bo ḧasił
nîgayê be lewḧ kerd dya pêşda
perê muşkiłan zana ne têşda
nûsyabê ce lewḧ sułtan îbrahîm
dił be xuday wêt yeqîn bo daym
meşî netoy kax ey syaẍułe
telîsim sexten cagey zengułe
hîç bakit nebo ta meşî we pêş
mewînî ḧewzê nekerî teşwîş
celay ew ḧewze sengê sya hest
bişo ew senge bawere bedest
şazade bew ḧerf kerdiş nîgahê
awerd be nezer seng syahê
horêza lwa bê xof û endêş
nîşt we ban seng şêr bî endêş
dîş meyoseday welwelew ẍerîw
awaz naxoş çun awaz dêw
şazade xeylê nedił xofiş kerd
bazhem fîkirş kerd ẍîret coş awerd
ce naga dêwê ama pedîdar
bedşikił û zordar qed wêney minar
mûy azaş ce terḧ ser ḧełqey kemend
zyatir mebî ce peşim gûsfend
teyr û kebûter cesub ta be şam
nesayey ew mû megirtin aram
dirextê bizurg ha ne ketif bał
ce tenxiway ḧerbe kerden begopał
watiş ey ferzend ’adił şay çînî
binyer wezemîn ew lewḧ ke bînî
werne yek çobê bidem we řûy ferq
ta heftim zemîn to mekerûm ẍerq
sake êd şineft şêr beçey zordar
řû kerd bew pelîd ew dêw murdar
watiş xudawend min kyasten wey ca
dêwan mel’ûn bikerûm fena
(înşeła) be ’ewn cehan aferîn
xelasît nîyen mel’ûn bê dîn
dêw ke êd şineft çûb giranbar
bidaş nerûy ferq ew şêr xûnxiwar
nîgedarîyş kerd dehendey dawer
ce zerb mel’ûn nyawerd zerer
şazade çun şêr dest da be şimşêr
řûkerd be mel’ûn watiş bedgewher
da ne kemerbend dêw cadûkar
kerdiş be dûnîm be wêney xyar
dersat peyda bî gerd û ẍubarê
sayeqey şerer berq û nezarê
sema tarîk bî çenî tozugerd
şêr diławer ser bezemîn berd
ne şerarey ah dûkełî piřcoş
yek şebane řoj newdem bî bê hoş
ce dimay yek řoj dîde kerdiş baz
dîş ejdehayê dehen kerden waz
coş ahîrş çun berq mexêzo
be xerwar xerwar ahîr merêzo
wextê dî beçem şêr bê endêş
tîẍ kîn kêşa pa nya we pêş
* dane gerdenş serş cya kerd
serş ce endam de qedem wa kerd
wextê telîsim bî ejdehay murdar
peyda bî ewcar maran sed hezar
şazade ew řo tawe’dey êwar
ceng kerdiş çenî maran murdar
ewend kefte bî lar we ban lar
řaş nebî têda bikero guzar
yekê mekuştiş cemar murdar
zyater mebî hezar be hezar
axir ’aciz bî şêr beçey xûnxiwar
’aciz bî temam cegyan bî bêzar
ewro kuştar kerd ta we’dey êwar
taxir řûkerdiş we dergay cebar