le xew hestanî noş aferîn û wituwêjkirdinî legeł dayenekeyda
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
2 Xulek
609 Dîtin
dîbaçey kîtab nadrey şîrîn
wey tewr beyan kerd ce noş aferîn
seḧer feraşan xan sipay zeng
hor pêça tenaf xeymey sya řeng
bêdar bî ce xaw şay şîrîn çare
bał çem hordaşt be lence û lare
horêza benaz baz şîrwanî
poşan we beden dîbay keyanî
daye wat ey şox nazdar bêgerd
ḧerfê mepersû ce lat nebo derd
ew kese kê bî îmşew hamřazit
tekye kerdebê dû bazûy nazit
ye řeftar nîyen girtenit ne ser
eger bizano padşay serwer
mekero we pend řûy řozgarim
gurbe mewzo netoy şełwarim
sake êd şineft şox sya xał
dest berd pey gerden zucacey ziłał
ber’awerd le’il qîmet piř maye
ne řûy îltîfat bexşa be daye
daye xoşḧał bî dane girt be dest
ce giftugoy bed ziman wêş best
watiş be daye ey ẍemgusarim
buyer ce teqsîr, xecałetbarim
xatirit cem bo kar we y tewr nîyen
bey destûr řazman me’lûmit bîyen
daye sakîn bî ce weswasey bed
ce kar dułber xatirş cem kerd
ta îne watin şew ama bekar
serzemîn poşa perdey sya tar
ferma meş’elan kerdişan řewşen
be şad berdişan pey baẍ gułşen
şem’ xoş terkîb şemdan bemûrî
meş’el we le’il daney feẍfûrî
paye we paye tertîb berdişan
pey zewq meclîs řewşen kerdişan
saqî mutrêban ḧazir bîn temam
suraḧîy piř mey ’ûd û badey cam
muheya be zewq kerden amade
çem ne řage bîn perê şazade