hatnî şazade bo lay noş aferîn bo carî çwarem
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
3 Xulek
869 Dîtin
îbtîda benam cehan aferîn
bwaçûm senay şay noş aferîn
ḧerfê mewaçûm neperdey derûn
bizanûm dewran ta çun mebo çûn
xana çêş kero çerxî çepî waz
yekser fena kerd ey saz û awaz
şay noş aferîn bewşoxî û řendî
sułtan îbrahîm bew diłpesendî
yekayek badey dewran kerdin noş
ce dunya berşîn şîn wecay xamoş
bwaçûm diristan sułtan îbrahîm
çenî řefîqan nigîn daym
ceno şazade serce sewday derd
arezûy cemał nuş aferîn kerd
bê sebir û aram horêza we pa
lwa we pabos şay ḧorî leqa
şazade çun şêr çenî yaweran
lwan we toy baẍ gułbaẍçey řizwan
yawan be xizmet şox şem řuxsar
ta nîştin we ban kursîy zeřînkar
şay noş aferîn horêza we pa
watiş dêr amay şêr diłara
her dû wesed naz niştin we ban text
des da ne zułfan şah şîrîn bext
çun bułbuł benaz nerûy guł mayl
dûdest negerden kerdin ḧemayl
dest nerûy gerden benaz û nyaz
dem ce naw dem be guftaru řaz
derdem kenîzan şeyday şox şeng
mubarek goyan be awaz û çeng
ce zemzemey saz çeng û çeqane
seday mûsîqa û saz zemane
ceyek la semtûr sazu awaze
yek la noşanoş binwaz binwaze
ey dinyay bê po ey tamendey deyr
kes nimezano be pêş kero seyr
her kes bunyo ey şox şengan
bewêney mecnûn meşo we kohan
fełek ḧeyran bî, perî matem poş
ce seday saqî û cam noşanoş
saqî peyapey bade mekerd keyl
meda beyaran menoşan bemeyl
noş aferîn wat merg min binoş
ew dest mekêşa pey ḧełqey gîsoş
zanû perê hem tekye kerdebên
řaḧet betekyey zanû berdebên
şazade dest berd pey yeqey cameş
girtiş nerûy dest dugmey şemameş
game bosawe û gamekerd efşar
gaga menoşa pyałeyê gułnar
ga dest nezułfan mewerd we çînda
pexiş mekerd be řûy cam cemînda
mwat min îmşew nekamen bextim
(seney) diłdarî bîyen we textim
zułf nazdarim bîyen we tacim
me’rûf ’amen sikey řewacim
ye şerbet ye cam ye bade û saqî
yemezey şerab ye ’umir baqî
ye ’eyş ye nîşat ye kameranî
îne bezim xoş ye şadmanî
îne newbehar dîdar yawer
ye şîrey nebat ye řêzey şeker
ye le’il leban ḧeyat baqî
yeşerab û keyf ye îmay saqî
yawan we metłeb murad wêşan
hîç arezûyê nemenden pêşan
’îşret mekerdin ta we sub seḧer
taweqit û we’dey ełahu’ekber
şazade ceyar řuxset tełeb kerd
teşrîf be menził mekan wêş berd