agahî yaftin micnun ra mirg lîlî û zarî nimudin
Li pirtûka:
Leyla û Mecnûn
Berhema:
Xanayê Qubadî (1704-1778)
7 Xulek
709 Dîtin
nîzamî ce qewl beẍdadî selam
wey tewre kerden îbtîdadî kelam
pey zanay xeber wefat leylî
hem mewt mecnûn qeys duceylî
řojê ce řojan qeys xatir teng
megêła ne toy xar û ẍar û seng
î ko we ew ko wadî û byaban
dîş dû şehsiwar aman şitaban
be seday biłind kerdişan seda
ey ẍafił ce ḧukim ferman xuda
şehzadey şa’îr ’areban beř
ne zanay merden leylî xatir teř?
besen bes îtir î sergerdanî
řicû’ ber be ḧukim qezay řebbanî
’îzzet û nefis û ’îlim û edebit
bidare niga ’ilu û mertebit
leylê şî neşon řagey řozgar
to cey byaban be zarî û zigar
çêş mekerî çêş? çêşt kerd cey wer?
be ẍeyr ce des day leşker û kişwer!
mecnûn cey hewał sext nahemwar
seyḧe û gêc werd seng asyawar
wat ey swaran ahir berşî lêm
î hewał çêş bî awerdin perêm?
xeyrê newatin çun nebî pêtan
xeyr ebedî neyo ne řêtan
girewa be zar tey kerdiş řahan
ta xêłxaney leyl xerme û xergahan
lwawe yaney bab û eday leyl
mała we serda dûd derûn keyl
şîwen leylê ce no kerd taze
cew xêł û ḧeşem bî we awaze
cem bîn ’eşayr ḧeyî û ḧewalî
pey te’zîyey leyl mewla û mewalî
qewman û xwêşan êl ’amîrî
aḧad efrad cenbey amîrî
qeys teslilîy xem mewat we bawan
ewan hem be qeys be zarî û giryan
be wêney xetîb lefzê kerd beyan
temam ce lutfiş aman be giryan
ce şehîdî řay ’eşq ḧeqîqî
we şer’ îslam ce řay deqîqî
ce sebir û sebat ce řûy mesa’îb
yawan we behre ḧazir û ẍa’îb
eḧsen watşan we ’îlim û ’eqiłş
aferîn pey neqił danş û feziłş
zanan qeys suçyay feził îlahîyen
boye wa bêzar ce padşahîyen
cem bîn ne dewirş we mîhrebanî
bab û eday leyl we xoş zibanî
naziş mekêşan ce tenxiway leylî
peşîman cew kar kerdey bê meylî
waldey leylê gişt sifarşat
wat be qeys[wêł] gerd gwazirşat
qeys wat derûnim ce ẍem byen keyl
řehnimayîm ken we meqberey leyl
eqreba û xwêşan xestey xwar û zar
mecnûnşan berd we bałay hezar
xunabey ciger wêney şem bała
guşad kerd ziban ateşîn ała
watiş ey mezar leyl bidye we çem
xasterîn jinan ’ereb û ’ecem
mîhman ẍerîb we ton xatircem
bê eda û bab û xało û benî ’em
şehîd ’eşqen bada hoşt bo
nek î emanet feramoşt bo
cew dima be coş diłey derûn keyl
ser nya we řûy giłkoy tazey leyl
wat ey taze guł xezan řesîde
ne cehan lway cehan nedîde
ne cay nazbałş peř qûy nazenîn
îse syay seng kerdî we bałîn
ne cay xergay xez ebrîşem tenaf
îse xak û seng kerdî we îsqaf
çonî ne derûn syay seng xar?
tarîkî û tengî zułmatî meẍar
çonen syaxał mişkîn daney to?
çeşmek? çeman ahwaney to
ew le’il leban abdar to?
ẍalyey ziłfan tabdar to
ce dîdey kê bo cilwenma’ît
ce meẍiz kê bo nafe guşa’ît
serut ce seraw kam coybaren
bezmigat ce kam guł û gułzaren
ya xo wêney genc ne jêr xakî
er genc nît pey çêş penhan û takî?
her gencê penhan ne xak bo ’aren
nigehban genc ejdeha û maren
min ew ejdehay syay řeşmarim
nîgehban genc defîney yarim
herçend ce suret ce min penhanî
ce řêgey sîfat cagîr ne gyanî
êd wat û řûş kerd we řay byaban
megêła û mewat şî’ir we şitaban
şew mama we pes dił û derûn keyl
menziłş megirt û meqberey leyl
ewend mersye û eş’ar diłsoz
mewatiş pey leyl wadey şew û řoz
qewm û bêgane maman we giryan
daym ’ezadar dîde û dił biryan
ce ḧał wanay şî’ir fîraqî
ḧerfî ce wefa û ’eşq nemend baqî
temamî awerd we řiştey teqrîr
nwîsendigan awerd ne teḧrîr
řoj be řoj mecnûn bêqerarter bî
ce sabqim cisimş xwar û zarter bî
ta řojê ama we diłey piř coş
seng sîney leyl girtiş ne aẍuş
pêçiş werd çun pêç maran zexmî
řêza eşk xûn ce řay bêřeḧmî
wana î sê şî’ir nwîsa we řûy xak
be nêşî naxûn xestey ciger pak
pałim dan we seng ax û daxewe
beharim berg řêz we řûy baxewe
kaş î ḧubib û ’eşq sebiz mebî carê
mezana we ḧał hîcir min yarî
binwîsan we ser seng mezarim
şehîd ’eşqen meden azarim
cew pey we diłteng řû kerd we bała
we dergay bêçûn kirdigar ała
watşi’ey xalq sema û sitaran
aferîdey gişt mirdû û gyandaran
qesemit be zat bułend paygat
medom we temam pakan dergat
îtir besen bes î sergerdanî
xatme bider wey zîndeganî
laqî be lîqay wêt[bibim] be meyl
cew dima şad bom be dîdar leyl
řaḧet bom ce dest zeḧmet dinya
be ḧeq eḧmed «xetmu al’enbyaErebî»
êd wat û nya ser we řûy zemîn
du’aş qebûł kerd «reb al’alemînErebî»
girtiş ne aẍoş meqberey diłber
gyanî şîrînş ber ama we ber
ewîş guzer kerd ce řubat çoł
řaḧetî ce seyr byaban û ẍoł
merdê hîlalî î hewał sext
berdiş pey xwêşan mecnûn bedbext
bira û xwaheran eqreba û xwêşan
yeqe û derûn çak xatir perêşan
êl ’amîrî merd û jin temam
waran we řûy ne’iş ew new tûł nemam
şîwen leylî û mecnûn bî taze
waweyla û řo řo berz bî awaze
be sîdir û kafûr be mîşk û ’enber
şistuşo kerdin endamş yekser
pêçayan we kifin sifîd bergewe
nyaşan we tabût textey mergewe
ne pałûy giłkoy gułkedey leylê
kendişan mezar ẍemzede xeylî
tey kerdin řahan ’eşq piř xeter
ce dimay merden bîn we hambester
çun cey dinyay dûn herdû bîn haw’ehd
new dinyay cawîd herdû bîn hammend
me’cerê sazan we řûy qebirşan
be watey xasan ulul emirşan
[guł] lale nyan we giłkoşanda
we řûy meqberey ’enberboşanda
ew řewzey bêgerd bî řeşk bostan
bî we ḧacetgay cergeyî dostan
her kesê mama ẍerîb û řencûr
řenc û ẍem hîcir ce ew mebî dûr
kes we bê murad nimeşî we pes
be lutif bêçûn padşay eqdes
řeḧmet û eřwaḧ ’aşiqan ḧeq
ba sefa û wefa miruwet şefeq
ewan şîn neşon řagey řozgar
şêwey ’eşq lêşan mend we yadgar
eş’ar xanaş pey yadgarê
mano pey yaran çend řozgarê
be nam xuda û eḧmed muxtar
xame biker xuşk xetim ker guftar
ḧemd û sena û şukir pey zat ’ellam
perê muḧemmed selat û selam
tarîx wefat qeys ’amîrî
sał heşta û hefit hîcrî û qemerî
hetsed û de sał mîlad mesîḧ
watey mûrexey beẍdadî fesîḧ
hezar û şeşsed û çil û çwar bêten
pey dostan ne bo xane pey kêten
sed hezar sełwat xatmey kelam
be řewzey řesûł «’ilîh alsilamErebî»