derwêşîmanen
Li pirtûka:
Dîwanî Xanay Qubadî
Berhema:
Xanayê Qubadî (1704-1778)
3 Xulek
1080 Dîtin
derwêşîmanen, derwêşîmanen!
mîrzam esasey derwêşîmanen!
kesê newaçî ce weşîmanen
ce tawişt derd, dił řêşîmanen
îradem kerden bişon we şaran
hîmmet bwazo ce tekîyedaran
ełła dos keron ce şay derwêşan
îḧsan keran pêm kîswet wêşan
tac derwêşî, xerqey, xerqey ’îbadet
cam cił kilîd, seng qena’et
muhir û muhrebend, ḧełqey zunnar kêş
cil bendî cizwan derwêşan pêş
long û şał, destimał, kemerbend, zencîr
bend şêr, qullab, řiştey şax nefîr
’esay badem ço, xirxałan qoł
cibey yeqedoz kełpos û keşkoł
patawe û papêç, wacben derwêş
gîwey marnegez, cewr bêdî kêş
şerit bo min ce dax serdîy zemane
qumrî ne ferqim bigêro lane
bipoşo kałay řengizerdî weten
seday nefîrim bişo we xoten
şax nefîr be doş, dest be ’esawe
çwar qełay cîhan bidem we pawe
her weqit perê xem dem binêm pêwe
sedaş çend ferseng bişo we řêwe
bey dem û desga , bey esasewe
pêł û xet û xał , pos û pasewe
sereřay meynet wernedem ce kef
eweł tewaf kem bargey şay necef
hîmmet tełeb kem , we aẍey qemer
hefit sał çun yek řo waz nekem kemer
tayf û yemen , bedexiş û bulẍar
bel’ûn û mel’ûn, esił ferheng şar
beẍdad û ḧełeb, kûfe û mîsir û şam
text estemûł ta «bît alḧiramErebî»
şar zengîbar, mułk bêqyas
mekan meymûn cezîrey neşnas
bitas û ḧebeş zengî ademxiwar
cezîrey waq waq şahan neberd çar
cezîr cezîran neway deryay nîl
cebeł cebełan we ten kerdey fîl
ẍar dirkûhî cezîran çoł
maway kergeding byawan û ẍoł
ne we řoj aran ne şew bakim bo
tikey zûx zam wêm xorakim bo
serpencem řêş bo we nêş xaran
şew yełẍar bidom çenî sitaran
şehreyn û beḧereyn deryay bêganan
yek ling seng sar , ta şar zinan
řagey byaban bigêro ne wer
bûyer û nezeyd, xurşîd xawer
ewsa cew demda bûyeron be cext
sed wiłat tey kem be wext û bêwext
serpencem řêş bo be nêş xaran
şew yełẍar medem çenî sitaran
ne her serzemîn dił wiyerde bo
kesê bew mekan namş berde bo
her hefit qulley qaf herde be herde
mekan dêwan qareman berde
derbend ye’cûc sed eskender
mekan me’den , yaqût eḧmer
cewla miletan kişmîr û kabûl
ser kêşon we cay harût û babil
bûyero ne deşt dêwî dwał pa
ta meşon we toy dexmey behmen şa
dexmey behmen şa, seyr kerû we coş
herko wiłatê bişnewo we goş
bêd giłêm goş serdeşt heyhat
siẍûr û mabeyn řoşnî û zułmat
«micim’ albiḧrînErebî» awan mebo cem
mebo firîştem bwênon we çem
bizano bêhoş , ya ser hordaşten
kam ’arf řeyḧan ne dewirş kaşten
ya we çaw koren ya we pa lengen
ya nimezano min wextim tengen
ya ce ḧeqîqet ce min bêzaren
min cew bêzarim heta dyaren
şefî’Kes řagey çoł girtenş ne pêş
mebo bigêło pey firîştey wêş