nyaz û xane
Li pirtûka:
Dîwanî Xanay Qubadî
Berhema:
Xanayê Qubadî (1704-1778)
3 Xulek
1062 Dîtin
nyaz wat:
zerîf xendewe, zerîf xendewe
zerîfî zerîf ha bew xendewe
yekiş baf zeřîn girt û çendewe
xene ha welay zeřřey qendewe
xane wat:
şîrîn xendewe, şîrîn xendewe
şîrînî şîrîn ha bew xendewe
dest xenařeng, girt we çenewe
xas xene kerdî hem be xenewe
nyaz wat:
pêşanîş we berq nuqrey xakewe
seru ’ereqçîn sîm sakewe
qaş we bał teyr řoy eflakewe
bê ser û peykan sîneçakewe
kafir peykanit cergim kendewe
xene ha we lay zeřřey qendewe
xane wat:
pêşanîş we berq beyzay beyzewe
seru ’ereqçîn şeř’engêzewe
qaş we bał teyr tend û têzewe
bê ser û peykan aşûbxêzewe
’ezîzen we lay xuda û bendewe
xas xene kerdî hem be xenewe
nyaz wat:
yeqîn bo kiłaf lûl û xamewe
mer kemend we keyf şa behramewe
beynê şîşey zeř weřoy camewe
leb we mezey ab řoy qyamewe
awêken ce xizir zende mendewe
xene ha we lay zeřřey qendewe
xane wat:
yeqîn bo kiłaf tazeşořewe
noşen çun keřek we simorewe
beynê şîşey zeř bo sinûrewe
leb we mezey ab elzihûrewe
awêken ce ḧewz kewser mendewe
xas xene kerdî hem be xenewe
nyaz wat:
gerden be giřey tełay aławe
çun guł medrewşo netoy waławe
ya sîřiř qudret we ew baławe
ya şewq xoren qudret kaławe
pesenden ce lay xuda û bendewe
xene ha we ban zeřřey qendewe
xane wat:
gerden be giřey sîm safewe
şaden be şedey cewrî bafewe
çun şewq xoren we řoy tafewe
daẍ nyan we dił çend seřafewe
’ezîzen we lay xuda û bendewe
xas xene kerdî hem be xenewe
nyaz wat:
dû lîmoy newřes sîney ’acewe
bew xał mawî sengîn bacewe
ya şewq xoren we řoy tacewe
yaney derdîn da we taracewe
xane wat:
dû lîmoy newřes ha bew sînewe
xałan ken we bar çîn û çînewe
ce zêř bałay çem we qînewe
yaney çend mecnûn da we twînewe
lałêken ce bał kawis mendewe
xas xende kerdî hem be xendewe
nyaz wat:
ḧuqqey naf we genictełabêzewe
çun guł bew qumaş sûrmeřêzewe
bew berg kałay beyzay bêzewe
mer şîrîn şox şah perwêzewe
telîsmen ne genc harûn mendewe
xene ha we lay zeřřey qendewe
xane wat:
ḧuqqey naf we genc kesnedarewe
keylen we boy mîsk rîzwanbarewe
çun bo penhanen we ’ettarewe
telîsmen we lay çend serdarewe
telîsmen neders harûn mendewe
xas xende kerdî hem be xendewe
nyaz wat:
řekib û řecil û kef, mînay bêgerden
řemeq řûxsar çend kesan berden
çend derdedran be xak siperden
hezaran ne daẍ hîcranş merden
ce řay merg mewt nyaz sendewe
xende ha we lay zeřřey qendewe
xane wat:
řekib û řecil û kef, xoşnimay şîrîn
saq sifîdey çun selc kerîn
neqiş dewr kef zencîrey zeřřîn
wêney nazdaran zemaney werîn
ce řay merg mewt xane sendewe
xas xende kerdî hem be xendewe