behar her dê
Li pirtûka:
Bargey Yaran
Berhema:
Hêmin (1921-1986)
2 Xulek
2391 Dîtin
le gyandana deguřênim bijî her kurd û kurdistan
begulley dijminanî gel diłîşim bête řawestan
pişûy dwayîm dexwênim bo guł û gułzarî em xake
le sayey em guł û gułzareye bûme hezar destan
dezanin zamî dîlî çend be’êş û çend be’azare!
debê rabêyn heta êmeş degeyne řêzî serbestan
xetay xomane ta êsta ke herwa koyle û dîlîn
ewaney şad û azadin kemê zûtir lexew hestan
netandîwe ke řûbarî xuřên berdî deqełşênê
wehaş her zordarî desûtênê giřî hestan
le meydanî şeřanxêwî xebatî qeřnî bîstemda
serim sûřma ke espî sûkeswarî kurdî bo westan
wełamî damewe pîrêkî azadey cihandîde:
xetay swaran nebû pêş swarekanman qurs û nawestan
humêdê bermeden řêgey xebat bigirin biřone pêş
temaşay xełkî têkoşer bedîktatorî çon westan
heta kengê syaçałî besamî dijminî załim
piřawpiř bê le řołey gel cimey bê wa le des bestan?
heta key eşkî xwênînî kiçe kurdî bira kujraw
le cêy bade û le bezmî dijminan bidrête des mestan
metirsin řołekanî qaremanî gel le gyanbazî
le kořî em xebate bê wiçane taqe yek kestan
sehołbendanî bêdadî egerçî tûş û dijware
bełam lêm sûre wek řojê behar her dê ledûy zistan
bexełkî ’alemî selmanduwe tarîxî azadî
debê załim leber têkoşeran berdatewe destan