hare sextenî
Li pirtûka:
Dîwanî Seydî
Berhema:
Sed (1785-1849)
2 Xulek
1874 Dîtin
hare sextenî, hare sextenî
to xo kem qîmet, sengî sextenî
çî bułend îqbał, saḧêb bextenî
yar ama welat, cehdu cextenî
tiraşîdey dest ser ustadî baş
cestet puř zexim qułingey seng taş
yadgar osay qedîm zemanan
des asî des kêş xyatey xanan
çiman taşyay têşey ferhad bê
destit ce nemam daray şimşad bê
aro qîblo min be lence û lare
teşrîfiş welay to aman, hare!
şîrînen nîşten dane medo pêş
hareş har kerden dewr medo newêş
megêło be dew çûn çerxî çepgerd
heyahûş germen menało ce derd
dû lîmoy weş boş terḧî şemame
cime cimşane ne yex’ey came
kes çûn to azîz celay yar nebî
hare çî weşî sa çî har mebî
tay tuřey zułfan syay ’enber bo
ser awêz kerden ta webanî to
dexîlen destit be destî yaren
penceş řêş nebo, hare hawaren
şîrîn be sed naz mekêşo deste
dane medo pêt çûn awat waste
daneş mesanî çûn sitemkaran
mekerîş we gerd tutyay şaran
taqet şî celam watim ey hare
be mewday ełmas bay pare pare
to destî şîrîn deste kêşten
awatit biřyan, nałey çêşten!
to pencey şîrîn keftenit weser
çî sařêş nebî zamanî xeter
ba min binałû řwan ta şewan
zedey hîcranim, derdim bê dewan
harey herasan, herdey herde gêł
kem dewr de ne wêt çûn dêwaney wêł
ane şîrînen dułber, dułistan
dił çêt mesano be mekiru dastan
be beyn û be qaş hîç mebe xere
cefaş sed baren, wefaş yek zeře
çenî kes ta ser hergîz yar nyen
yarî saḧêb şerit wefadar nyen
katê mezanî hor êza be qes
çûn bê beynetan ce toş kêşa des
şî be maway wêş teşrîf berdewe
toş astî welay dax û derdewe
kotayî sedaw ne’rete û dengit
bê qîmet ginay, kesas bî sengit
be diłey puř soz meynet barewe
pêçyay be derd dûrî yarewe
ewsa çenî zam bê deway xeter
mat mebî bê deng, ce seydîNasnava edebî beter