qîblem tasemen
Li pirtûka:
Dîwanî Seydî
Berhema:
Sed (1785-1849)
2 Xulek
1015 Dîtin
qîblem tasemen, qîblem tasemen
min pey to qîblem, xeylê tasemen
çûn kurey ahêr dûy henasemen
hersat ne diłda sedu swa semen
ga şeyda, ga şêt, ga ser samenan
bê taqet, bê sebir, bê aramenan
ga meşo çûn seyl esrîn ne çemda
ga ẍerqim ne gêc beḧrî matemda
ga eyamî wesił megnowe yadim
hîcran mekero xatir naşadim
ce dûrît ne wext, ne bê wextimen
daym êşî derd zamî sextimen
herdem bê demax xatir zwîrim
hergîz nimeşî tawê ce wîrim
qîblem ce her şar to mekerî cêt
çûn qîble nima řû mekeran lêt
ta gerdûn gerdî min nedo be bad
qîblem nimeşo hergîz tom ce yad
wêm kerden pey to be qeysî sanî
nek to min kem şerit, bê wefa zanî
ne to ew xwacey bê şerit û şon bêt
ẍułamê û çûn min dûr darî ce wêt
ne min ew ẍułam bê wefaw beyn bêm
pî tewr ginû dûr celay xwacey wêm
dewrî gerdûn bê kerdiş î sitem
dîdem, min û toş dûr wisten ce hem
sed ke damenit wer bî ce destim
her ẍułamî tom hertake hestim
er to ce «şîraz», min ce «şam»enan
to her xwacenî, min ẍułamenan
yaran çêş mebo eger çerxî seyr
emcar bişano pêman nerdî xeyr
nerdê bişano nexşiş dû şeş bo
perê çend řwê jîwayma weş bo
qîblem, çiraẍim, er xwacey xasî
her bendey tona min be îxlasî
seydîNasnava edebî ta zîndey dewrî eyamen
muxlîsen, ’ebden, benden, ẍułamen