sengî hewaran
Li pirtûka:
Dîwanî Seydî
Berhema:
Sed (1785-1849)
2 Xulek
1373 Dîtin
sengî hewaran, sengî hewaran
sengî sya řeng kone hewaran
cay bezmî řendan nîşangey yaran
textî xał xałan nazk nazdaran
ce zeł mezanû sufîd sengenî
êste sebeb çêş sya řengenî?
kon ’eyş û nîşat new weharanit?
kon ahûy řendan pol nazaranit?
serxar çûn to koy ’enber poşan bî
daym ameşo welay toşan bî
êste cay ewan çołen wêranî
eḧwałî ewan to çêş mezanî?
sa ke êd şineft sengî sya řeng
be ah û nałe lêm ama be deng
eḧwałî derdim dêwaney bê hoş
mer nimezanî çî bîm sya poş!
ewsa min hemřaz xał qetaran bêm
tekyegay řendan pol nazaran bêm
řengim sifîd bê çûn řengî kafûr
şewqî cemînim dyar bê ce dûr
nagah pey teqdîr çerxî puř sitem
ême û nazaran cya kerd ce hem
êste ne pam hen bilûşan we şon
ne wêm mezanû mawaşan çikon!
fełek er zanêş çêş aman pêman
dûrî nazdara nermanê pêman
kerdaş duçarî dûrî û cyayî
nyaş be diłda daxî syayî
î dax her pey min ta řoy «řestaxêz»
çûn hîcranî yar girtenim beřêz
ayrî hîcran kewten ne cergim
syawiş kerden ser ta pay bergim
çî kûrey ayr min ne coşenan
ce sîney seydîNasnava edebî syaw poşenan