çîye ey guł ke řengit êste sûre
Li pirtûka:
Dîwanî Eḧmed Muxtar Caf
Berhema:
Eḧmed Muxtar Caf (1896-1935)
3 Xulek
3504 Dîtin
çîye ey guł ke řengit êste sûre
çi weqtî şadî û ’eyş û sirûre
peřit bo ał û řengînin beharan
duř’efşanin le qetrey awî baran
meger ḧîsist nîye takû bizanî
le xakî kê řwawî boye cwanî
eto nazanî bo çî ał û sûrî
le bezma mayeyî keyf û sirûrî
eger bibwaye lay to ’eqił û famî
demaẍ û mêşk û ḧîssî temamî
le cêy sûrî be řûzerdî ehatî
gełařêzit ekird êsta ke matî
serit weqtê ke derhênabû ebwa
be řeşpoşî bihatîtaye dinya
etirsim çunke to bê ḧîsse goşt
wekû însan nîye efkar û hoşt
nebî ḧałî le me’rûzatî bende
heta şermende bî to serifgende
ema her wextê hengê yaxu mêşê
ebînim min beser towe enîşê
heł’ebziřkê becarê řengî ałit
peşêwî dê beserta wezi’ û ḧałit
ke wa bû dyare ey guł to efamî
ezanî û saḧîbî ’eqłî temamî
eger bêt û bikem ’erizit ezanî
ke to boç wa teř û taze û cwanî
ke wa bû êste ey guł to bizane
sewzbûnit le xakî dulberane
leser xakê binî řîşet řuwawe
be cergî ’aşiqana daxî nawe
we ya sewzî leser xakî ḧezînê
ke kujrawe be tîrî nazenînê
leser qebrî şehîdêka řuwawî
be xwênî cergî ew to aw dirawî
ke daynawe ḧeyatî xoy be merdî
lepênawî wiłatî qewmî kurdî
le liq boye ke to ser der ehênî
be çił sewzî be řengit mîslî xwênî
bełam madam ke meḧuyî ew kesane
ke emřo mayeyî cîlwey gułane
lebo to bote mayey ’eyş û xoşî
be serberzî ke bergî sûr epoşî
eger bibwaye to ’eqiłit le serda
ebû bîkey cilî matem be berda
we ya xud to be yadî řoḧî yaran
ebû bulbul bilawênî beharan
ke ew teyre ewend mecbûrî toye
şew û řoj bo wîsalit řenceřoye
keçî napirsî to esłen le ḧałî
demê nakey be dił meylî wîsałî
bełê ’aşiq ke nałey wa ḧezîne
hemû sermayeyî ah û enîne
lelay me’şûqe wek dengî řubabe
eger çî ’aşiqî cergî kebabe
welê me’lûme cewr û zułmî diłdar
ebê ḧeddêkî bê bo ’aşiqî zar
xisûsen to ke xułqawî le xakî
gelêkî sê kesî serberz û çakî
eşubhêy to be yek lew syane ey guł
ke kunkun bû be ẍemzey sîne û dił
wekû ew dwanekey tiryane bulbul
diłî meşkêne tuxwa ḧeyfe ey guł
le derḧeq bulbulî bêçare û zar
ewend meẍrûr mebe nîşan mede xar