řojêk le geşt bûm, le kohsarêk,
geştêk
Li pirtûka:
Dîwanî ’Ewnî
Berhema:
Ewnî (1914-1992)
3 Xulek
703 Dîtin
řojêk le geşt bûm, le kohsarêk,
le jêr saye û sêberî darêk
danîştim aram, mandûm sayewe
serim hełbiřî awřim dayewe!
ke temaşam kird, pîre dar biřû
be şiney şemał, dehat û deçû
bîrim kirdewe temenî dirêjî
ger lêy bipirsim çîm pê debêjê
ger řabirdûy xoy bigêřêtewe
zor nihênî man bîr dênêtewe!
ger lêy bipirsim deng bidatewe
bê guman zor şit řûn dekatewe!
pîre dar beřû dengî damewe,
zor le řabirdûy bo gêrřamewe!
gutî: dewen bûm katê bûm be dar
kewtime jêr destî řojgar!
bot bigêřmewe gişt beser hatim
kem debêtewe le wext û katim!
yekem řûdawêk ke dête yadim
bot degêřmewe zor pê diłşadim
de hezar serbaz leşkirî yonan
legeł geznefon hatne kurdistan
le ser çyakan berd baran kiran
le dway şeř û şoř, zoryan lê kujran
be ser şikawî be wirgî diřaw
perit û biław bûn wek pořî xuraw
hezaranî tir seryan da le berd
hatne kurdistan bûne toz û gerd
pîre dar gutî: řojêk le řojan
lem dewr û bere sûpay cengîz xan
řojêkîş teymûr, řojêk holako
kewtine tałan û kuştar û biřo!
em kurdistane bû be gomî xûn
kej û daristan sûtan bûn be tûn
lêre lem kêwe dujminî bedkar
hełwerî û řija wekû gełay dar
min çend sûtam her jyamewe,
çonim debînî herwa mamewe
çya berzekan kêwanî serkeş
nîştimanî kurd nakirê beş beş
ewey kurd bixiwa zû deřşêtewe
boy hezim nabê deyhênêtewe!
dagîr keranî hatne kurdistan
negeřanewe, çûn bo gořistan
kurd herwa jya, herwa mayewe
na twêtewe û ne tawayewe!
ne sułtan selîm, ne şay sefewî
neyan twanîwe kurd ken ser newî
bo em mebeste, zor koşşyan kird
ke wa han biden, kurd le dijî kurd
bo ewey xoyan be diłnyayî
kurdistan beş ken be nařewayî
bełam gelî kurd dijyan řawesta
em bîne û bere, mawe ta êsta
êstaş xerîkin kurd bitwênnewe,
mêjû bere û daw bigeřênnewe!
xeyałyan xawe kurd natwêtewe
çerx bere û dwa na sûřêtewe!