kuřêkî lawî şox û şeng ke taze pêy nabuwe...
kuřêkî lawî şox û şeng ke taze pêy nabuwe beharî cwanîy, legeł pyawêkî pîrîy nûranî ke le xezanî pîrîda seretayekî bû bo ew peřî ew xezane, kewtine wituwêj, kuřeke hat be bałay xoy û cwanîda witî: babe řojanî cwanî ew řoje ke êsta minî têdam - beharêke, ke her demarêkî le awazêk û her řengêkî le sazêk lê eda. ew řojaney ke beser mina dêt, leber ew hêzî cwanîyem, ne le lafawî bexuř epiringêmewe û ne le tofî sermay beguř esłemêmewe. şewanî ew cwanîye, řojanî kameranî, be řoj legeł gułendamanda jwan egirim, be şew legeł diłdarana dest le milan ebim, be lûtelawe eçim be layanewe, ewan be ẍemze û nazî mestanewe dên be lamewe. tirs wekû hirs lêm etirsê û nayet be lamewe, pelamarî diřindane edem, le wext û nawexta bał egirmewe bo nehêştinî ew şitane ke awîy řûn le jyanî bûn lêł eken. eger xem wekû tem bêt beserma, be diłî xoşim û be henasey germim ew xem û teme wekû befrî ber řihêłey behar etwênmewe, be diłma nayet bîrkirdinewe le asoy guzeran, şew ser ekeme ser berd, be řoj egeřêm le şax û le herd, bonî guł ekem le bax û gułzar, be neş’ey edem le awî řûbar, exomewe aw le kanîy dyar, şêr berew řûm bêt wekû pîr behêzî cwanîm ew şêr û pîre wekû mû le şêr der kem bewcore deryan ekem, senger edřênim, lenger eřûxênim, ała ehejênim, dujmin etirsênim. ne tirsim le şewî zistane, ne bakim be tewî pîrane! lem dewrî gencîyema be řencî şan û gencî direxşan le řojî řûnakî ehênmewe dest, pyawetî beserewe ekem, merdayetî pê enwênim, şewîy ahengî pê espêrim, hîç diłim naye ke eme xew ebînim, eme qisey pîrane ke ełên: cwanîy, hetawîy bin dîwarane! nan ew nane îmřo le xwane, cwan řûmetî ebê be hêlane, nîgay nazdaran çawî ebê be cêgay dîmenî gułzaran, diłî be baxçey beheştîy diłdaran.
ew goçaney to xotî pê egêřîtewe, min mamzî sarî pê ehênmewe, ne ezanim bêxewî çîye, ne ezanim birsîyetî bo kêye! egeřêm be baẍa gułewçin ekem. eygirim be destim, eybem bo dostim bonî pêwe bika be bênî dirêj; ke min seyrî kem ebim gêjuwêj, bełam ew gêjîye dunyayeke ke perdey qyamet edřê û awîy ḧeyat le kêfî qafewe dênêt!
emca bawkî pîr dête qise û ełê:
řołem! řaste řojanî cwanîy xwanêke û le dîwexanêke, xwanîy nyaze le dîwexanî bênyaze; bełam ew řoje wekû awîy par hîç nabê dyar. pîrî axir sermayey jyane, wa mezane sermayeyekî bêsermayeye, kałayekî giranbehaye ke le tewnî řengawřengî dinya dirust buwe, le şîley hemû gułêkî mijîwe, le řengî hemû gułêkî biřîwe, awenyakey taqîkirdineweye, berekey paławtey hemû karesatêke, le birtey sardî û germîy dinyada qał botewe le awazî hemû sazêkî gwêy piř botewe, xoy buwe be wecaxêk ke hemû core nanêkî lesere. ke çî arezû bika, lewey edatê, pendekanî ew řêgay řûnake bo řêbazî cwanan. bîrîy, kanyawêke ke be sedeha cogey lî hełgîrawe. dastanî ziman û karesatî dewran, hemû lew řûy dawe! ewî pîr le xiştî kała eybînî, cwan lenaw awêneşa betewawî naybînê. řaberî padşahan, awêjî řewan, xemřewênîy naw małan, asoy bîrî çawkałan ew pîreye ke řeng eřêjê, xet ekêşê, le řojî şeřa, fermandare, kemandare, diłbêdare, fîkirî ew xendeq eřmênê, dujmin etirsênê, aw serewjûr eba, taw be pişû eba!
řołe! bełê pîr mûy sipîye, bełam her řusteme û le zał ebê, bełê kafre belay řûmet gułanewe, bełam îslame belay řoşnidiłanewe. netbîstuwe ew nazdare ke ełê:
pîr, řencî be gence; gencî xezneye, destî têrî leser sikî manduwe, hewrazî biřîwe, nişêwî becê hêştuwe. ke danemay barî ḧesanewey xist, le dîwexana le serewe belay padşahan lebereweye, ’umrî hemû gewhere, řazî hemû cewhere, mel û qař beseryewe lenger exa bedewryewe. řołe! bełê pyawî pîr, bazûy bêhêze, bełam be bîr û hoş behêze, fîkirî, mûrûy řeş le şewî tarîka edozêtewe, awêney xeyałî, mirwarîy binî derya ebînêtewe, pelkezêřîney êwaran ebestê be giznigî hetawîy beyanyanewe, ezanê dûřî zimřûtî cwanîy ke le koşya bû kewt! ba çawî wiqarîşî bibřête ser erz, bełam zanaye bewey ke şitêk kewt, taze nayetewe dest, boye seyrî erz eka bo ewey zewî şermî lê bika.
kuřim! ew lawey ke wa pîr ebê, ew erzey ke witim; her boy şêt ebê. em diłî germe boy, ewîş beşerme, her yek bo yek diłekey germe, sipîy bergî melaykeye, lew berge kewtote ser ew kese ke melake řûy tê eka, hêzî cwanîy, pêzî pîrîye, zemanî cwanîy, řêbaze bo pîrî, herkes bimênê ebê bibînê, be paç û bêł têy ekewê ta le řojî pîrîda tê ekewê! le cwanîda wamezane hemû řojî her waye, ebê ewe bizanî ke řojane, řojî ledwaye!