mîrzam tom ce yad
namey jimare 2 bo hawserekey, ’elî ekber xanî erdełan, nasraw be şirf almilk
Li pirtûka:
Şî’rekanî Cehanara
Berhema:
Cehanara (1859-1911)
2 Xulek
1439 Dîtin
mîrzam tom ce yad ...
mîrzam gyanu to, tom neşîyen ce yad
meylim her we ton, her wetowe şad
dił her ce lay to, yawan be murad
xatir piř gerdît xetay min çêşen
pey çêş çenîman xatirit řêşen
pey çêş xatirit lêman řencyan
to watenit derd, min watenim gyan
min ce emir to nîyenim teqsîr
mîrzam to naheq lêm mebî diłgîr
eger min carî tom kerden řence
destûren ane pêş maçan lence
ẍemze û kirîşme û lence û larey yar
mebo bikêşo, ’aşiq be sed bar
min nazim kerden to maçî cengen
ceng nîyen mîrzam, ane gişt řengen
er meyl kenîz, menden we lawe
bipêçeş we berg, saf waławe
bikyane perêm, ta xatir cem bo
endêşey şewan ce lay min kem bo
werne bînayîm, hey berguzîdem
daym mewaro seyłat ne dîdem
er sed ke bedan be cengiş maçan
ew cenge cengî weřinger maçan
megêre ne goş watey bedkaran
bedan, bed maçan nebeyn yaran
xeyałşan beden, bedan bedgo
cyayî mewzan, beynî min û to
şertim ew şerten, min şertim kerden
’ehdim şerîken ta we řoy merden