şino bad serd fesił pa’îzen
Li pirtûka:
Hewargey Diɫan
Berhema:
Seyd Tahîr Haşmî (1915-1991)
2 Xulek
690 Dîtin
şino bad serd fesił pa’îzen
ya kizey nesîm meyl azîzen
tefreqe kerd cem gełay nemaman
berg û newaşan řêza we daman
nemaman wêney barmeynetkêş
azaşan ce zor serma bîyen řêş
mîwey nemaman xasey saf berz
mayey lezetiş bî wetawwilerz
bełê, herkesê newnemam me bo
ḧasił, her îdiş we encam me bo
azîz şehd wesił ce des řefte bî
ce tirşî hîcran tînîm kefte bî
xeylê pîç werdim çûn zułf yaran
weḧşî bîm çûn çem nazk nigaran
gerden dam we bend çûn gunakaran
des dam wehemda çûn derd ewgaran
lerzekey nakam serdî meyleket
yawa we ser wext ce xem keyleket
ladê we zigar we dem derdewe
çenî lerz sext çuqim berdewe
axir ce germî dîk diłey teng
lerzekem wetew horgêła ce řeng
çendê çenî tew, çendê çenî lerz
ser berdim we bang zayełey sed terz
axir ce derûn ser kêşawe der
ayr çûn kiłpey nayrey seqer
er fermay wey ḧerf medey firêwim
şayeten zaman soçyay lêwim
yend derûn germ bê tewlêş gurêza
bełam meyleket ne cahornêza
îse bê derdim ce saḧb derdî
gîrodey jaraw derd diłserdî
ax min pey ha min germî meyl leyl
wêney gedayan derûnmen keyl
ba bezeyît bo bey bê bergîmda
bey ce taw ’îşq sifte cergîmda
ce germî meylit ba nebûn bêberg
her ha minim bo ta zimsan merg