fełek ne bextim berq sitem da
Li pirtûka:
Hewargey Diɫan
Berhema:
Seyd Tahîr Haşmî (1915-1991)
2 Xulek
584 Dîtin
fełek ne bextim berq sitem da
weseryaney dił sa’îqey xem da
bewterze, terzeş ne bextim wara
bax şadîm kerd we xak sara
ne her dyarê, seyl horkerdewe
kiştey arezûm, lafaw berdewe
qehqehey xendey bedan we bextim
berzen, be wêney zayełey sextim
taney nakesan řîşey hestîm kend
çifey bedwazan mayey şadîm send
wadey nadrust yaran gyanî
guftardûřeng dos řoḧanî
ameşoy we řast, řeqîban çewt
yekser pêm noşan badey fenay fewt
merdił ce seng bîm, tekanim newerd?
terk řewyey şerit yaranim nekerd
bezeyîş nama kes welałemda
we seḧer hana û şewan nałemda
cefay çen sałem gişt we heder bî
ax nexił murad ’umirim bêber bî
gêce lûl qewł namerdî merdan
toz cestey min berd perê herdan
tûtyam neçem sûdey ełmasen
ḧerîr we bałam wêney pełasen
mey şadîm jaraw derd meyneten
bułendîm pestî, berzîm nigbeten
şerbetim şereng, gencim we maren
bułbułim qaław, gułim we xaren
dosim we dujmin, yarim eẍyaren
řoşenîm zułmet, sefam ẍubaren
řasîm we diro, ḧeqim batłen
deway derd tebîb, perîm qatłen
bazařim kesad, sûdim zyanen
neqdim na řewac, mayem ser janen
wey tewre min bîm ce diłber meḧrûm
tahîr, nedyenş dîdey dehirşûm