kon ew dił dîdeş berayî bido
Li pirtûka:
Dîwanî Mewlewî
Berhema:
Mewlewî (1806-1882)
1 Xulek
634 Dîtin
kon ew dił dîdeş berayî bido
we germyanda bidyo we bêto
kon ew çem bêto bew řeng diłşad bo
seyrî menziłgey êłaxiş yad bo
dax pey to çi tewr bêřeḧmî kiryan
êłat pey êłax baz îzinş diryan
heway werkawan çenî to weş bê
seday şetawan çenî to weş bê
tay çînî çinûr pay tafî befraw
her we to mekefit ne dewrey kiław
her guł pey demax bo ’enberîn bê
destiş her we des towe şîrîn bê
îse kên pey seyr dił ne aheng bo
we bêto dîdem mer dił ce seng bo
kałay matemît pey ałem senden
deştan gişt zîndan herbendan benden
hewarge matem, guzerge bêřeng
şonekem piřxem, seyrange dił teng
xwêşan perêşan pełas ne gerden
tu xwa bazeşan çun toşa merden
bêto karubar berteref menden
serkarî paşa bêmesref menden
bezmî hamferdan bêzewqen bêto
nezmî hamderdan bêşewqen bêto
pat we toy perdey pêwarî kêşan
cekam hamdemê xatirit êşan?