diłe çend mestît cem bî ne serda
Li pirtûka:
Dîwanî Mewlewî
Berhema:
Mewlewî (1806-1882)
1 Xulek
2776 Dîtin
diłe çend mestît cem bî ne serda
çend karî arot wistew řoy ferda
şertêwim nîyen ce bêşertîy to
řû syay tobey sed ferda nebo
nekeftî ew řa pey ḧeq peristî
ta bî we hemtay mestî pay sistî
pîrî ḧełqesan xem penem werden
pey dergay ’edem amadem kerden
serwextî eday emanetmen
neşrî syahey xyanetmen
muẍennî, tenxiway min we newayê
wey çend ferdewe hurder sedayê
ya řebî ney şew tarîkey fanî
her to we kirdey bedîm mizanî
ay subḧî meḧşer ser efgende wêm
şermindey ḧuzûr xuda û bende wêm
be řeḧmekey wêt ferdî tenyay tak
beşqî meşqî ’eşq diłpakanî pak
bew fesłî fîraq xatir piř xaran
bew dyay dimay yektirî yaran
er sed tawanim ce ḧed ewderen
defterm ce řûy wêm syateren
to buyer ce min ce piř însafî
min řû zerdî wêm kafîyen kafî