ey kameranî
Li pirtûka:
Dîwanî Kakey Felaḧ
Berhema:
Kakey Felaḧ (1928-1990)
2 Xulek
988 Dîtin
ey kameranî! geşe û řûnakî hîway jyanî
bo şew şebeqî, giznigî xorî demew beyanî
tirîfey mangî, cirîwey xoşî estêrey geşî
řoşin kerewey dił û derûnî tarîk û řeşî
to ew mebeste pîrozey berew qonaxî şadî
yekem řaberî karwane gewrey ademîzadî
to çareserîy derdî giranî gyanî komełî
bo dozînewey řê le jyana giř û meşxełî
wêrane ger to biçîte nawî, xoşe, awaye
to hebê xem û pejare û sizakey le nawaye?
to hebî ewey ke wa hejar û dîl û kiłołe,
bext û nawçawî řeşî le tawa awarey çołe
to kilîlêkî zincîr û kotî pê ekeytewe
cerg û henawî řeşî bedbextî ber edeytewe
eweş ezanim ke to ne behrey, to ne xełatî
bełkû berubûy bepît û feřî towî xebatî
çen lafawî xwên, xwênî geş û ał bo to řijawe
çen kelley ser û mêşkî bilîmet bo to pijawe
çen pê hełwerî bedem zincîr û kotî sizawe
çen dest û meçek lenaw asna bo to řizawe
çen mil leser to, be řojî řûnak, kira be peta
çen ceste, çen gyan, sûta le botey cewr û meyneta
çen diłî nakam, êsta le ser to, esperdey giłe
gilêney çawî çen gułî nazdar zedey çiqłe
çen gyanî nebez bo to, leser to, gîrodey bende
dîlî zîndanî teng û tarîk û ełqey pêwende
çen cwanemergî xêr lexonedîw ke gyanî derçû
beste û goranîy awat û hîway toy leser dem bû
be kurtî mak û hewênî şadî û xoşîy jyanît
benirxî boye weha girane qoçî qurbanît