le qawexaneyekda

êwareyekî temawî û qawexaneyekî terîk.
leser mêz, binemomêk esûtêt û kiłafeyek şewqî zerdibaw eda le qijî şî’rêkî tazezawî ser kaẍezim.
sêberî bejnî qełemim
dirêj buwe wek meçekim.
anîşkim leser qeraẍe û serim topêkî manduwe û
xistûmete naw colaney destî çepim.
kupî qawey dem be haław heł’egirim û kemêk xom be pişta exem,
çaw heł’ebiřim:
lewdîw camxaney pakewe:
awî «danub» le sermada heł’elerzê û
temêk nîwey pirdî gewrey dapoşîwe û
wa xerîke binîşête ser bûlêłî nîwetarîk.
lewberewe: masîgrî şepqe le ser
be ser pirda danewîwe û destêkî lenaw hewada řakêşawe bo pêşewe û
qulapekey hełdawete naw řûbar,
bê cûłeye û çon westawe, bote peyker!
lem berewe: jinêkî şox nuqim lenaw ferûy pałtoy awdamanî piłingîda
hengawî xêra hełdênê û be dwayşewe
tûtełe segî sipî û xirpinî tûk leserçaw řê ekat û
lepřêkda, seg ewestê û laqî řastî heł’ebřêt û be darêkda heł’emîzê
le asoy řojhełatewe: fiřokeyek
lûtî kirdote asman û nawbenawê
çawêkî sûr etrûkênê û perdey hewrekan kun eka û
wa xerîke taze bifřê
kupeke da’enêmewe
eçme naw gemyey şî’rî řengawřengim
dû wişey taze ekem be sewłî naw «danub» û ewsa
le qawexaney terîkda
wek twanewey binemomê û
yadgarêkî temawîy
em cêgaye becê dêłim!