dił tem kerdewe girtewe kawan
Li pirtûka:
Dîwanî Mewlewî
Berhema:
Mewlewî (1806-1882)
2 Xulek
1070 Dîtin
dił tem kerdewe girtewe kawan
dîsan dûy namey toş wela yawan
mezmûn: heway merg, zamdarî tîrit
penhanî qatîl, dewa û tedbîrit
lał bûn pey meynet cestey xesteket
bimrûn perê zam cê neřesteket
min û to beław zamman awerden
ne çeşmey ḧeyat awman werden
xeyałî xamen îne to kerden
peyma nimebo cyayî we merden
ha çend hewat da we gêcî bêpey
bimrî û binałî gyan teslîm nekey
taze wargey ’eşq menził kerdenî
hewesyay hajey bałî derdenî
xusûs bew cestey xestey mehcûrî
keftenî ne pêç řay dwey dûrî
hoşt ne toy kax demax fîraren
werne çi xêren qatîl dyaren
kê bo çun xedeng naz hewa dero
heryend bizanî cewpeř buyero?
kê bo bew cemîn nezaket çun guł
xeymeş hurbida ne pay deştî dił?
kê bo pêko dił zamî nesrefteş
yekêw kuşteş êd ew zemîn kefteş?
er řistigarît cew derd umêden
deway xelasî û tedbîrit êden
mebo wextî sext zaman awerdet
řema û pelepel herdew herd kerdet
pey çêş ta îse lêt me’lûm nîyen
seyad ce wakuj dirêẍiş nîyen
bełam ye řewyey îbtîday meşqen
xîlafî şêwey tawyay ’eşqen
dexîl ser sext ber her biker bazî
nazî dił serd bo ce tîr’endazî
ne diłey piř zewq kone neçîrda
hay lezet daro tîr we şon tîrda