riftin şîru bir balîn xisru û aw ra dir rixtxiwab bih zixim xincir hilak nimudin
Li pirtûka:
Şîrîn û Xusrew
Berhema:
Xanayê Qubadî (1704-1778)
2 Xulek
368 Dîtin
ye watiş şêro bê řay bê endêş
xuroşa be qîn, pa nya we pêş
coşya be xîşim sî sitare
coşya ce qîn, qîn da ne çare
gêła be sed řeng, tundya be tar
xûnîy ẍezebnak wêney jar mar
leb girt be dindan, pa nya ne wer
dest berd deşney têj kêşa ne kemer
ce qîn qatił ẍenîm xûn řêz
ama bê aman pey qetił perwêz
yawa be xusrew midra bê edêş
pay çep winara, řast awerd we pêş
penceş da we têẍ taze saw têz
be quwet pêka ne cerg perwêz
têẍ taze saw xûn alûy ẍeza
kêşa ne mewdaş zwaney qeza
mewday mû şikaw berq bê aman
qebzey qezay qesd awerd we daman
ce berqey birût berq bed ne dem
birûskey buřřan çun şefaf çem
ce sehim sîmay ser nûk xwên řêz
sema lerzya, zemîn da sitêz
quwet da be qesd bê řay bê edew
be zor bazû pêka be xusrew
pêka ne cergiş ser saw tazeş
mewdaş berliwa ce muhrey mazeş
pêka ne řûy cerg, bend dił biřî
lîḧaf şikawa, doşek hurdoy
tekanda be taw ne cergiş berşî
nimena berqey berq ateşî
çend zerb karî êd ce ew beter
yek yek ne cergiş kirya karîger
ḧerbey zerb zor ser mewday xencer
pêkaş be xusrew ser mewday xeter
xusrew ce heybet deşney taze saw
har û herasan herasa ce xaw
yek zerbê henî be neberd qest
şana ce cergiş ber lwa ce dest
berşî ce xusrew beden kerdiş çak
mewday mû şikaw cewlaş nêşt ne xak
xusrew xestey zam zîřna be zar
gurêza û berşî şêroy şermesar
perwêz şew be şad bade werdebê
bazûş ne balîn şîrîn kerdebê
nelexşa ne caş xusrew be asman
nek şîrîn ce xaw bibo herasan
wêş kêşa we pes, cya bî cew bon
nek berg şîrîn bidryo be hûn
be nerim û nazk be cestey xeter
minała be zar çwo gaw kebûter
law da ne cagey cemîn camewe
sernîgûn hûn, des be zamewe
zedey zam xeter, cerg ciger çak
xestey xeternak ẍełtya ne xak