tidark nimudin ’irusî şîrîn cihit xisru
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
369 Dîtin
wextê şay şîrîn meşrîqî be cext
wêney xusrew nîşt ne feyrozey text
be dêbay zeřřîn şołey sebiz û zerd
wêney new ’erûs sub arayş kerd
şa pey ’urûsî şîrîn ermen
ko kerd muşk û ’ud ’enber be xermen
fermaş hezar esp řexiş poła sim
peřřanter ce tîr şehab encum
gişt be dukdukî surme bafewe
be řext û řeḧşey tełay safewe
hezar hem uştur bor û bor bahû
tawsîy pa zerd çem wêney ahû
gişt bar ce sendûq şax nebat û qend
ce nuqił û badam qurs diłpesend
hezar peristar newřsîdey no
gişt bo ’enber zułf, mu’etter lîmo
hezar hem ẍułam xara û etłes poş
teng bend, dane bend, daney duř ne goş
çenî çend tepłek mucrîy zeřnîgar
agende ce muşk lûlûy şahwar
sendûq û mefreş xeymey bo ’enber
nosed ta hezar bełkim zyater
gişt piř ce dêbay xara û xetayî
ce parçey gułxar zemîn tełayî
text «mukellel» ce yaqût zerd
peyker zeřfişan lał û lacîwerd
be muşk û ’enber amadeş kerdin
xase pey şîrîn ermen awerdin
wextê be metłeb ew cemîn çun cam
esbab herçî bî yawa be encam
şa ferş ta saz ’urûsî jendin
dane û cewahêr be gewher şendin
pol pol perê řuḧ berqey naz ne ferq
ce ser ta we pa ce gewherda ẍerq
ta şineftin deng piř xuroş saz
wêney çerx tewr kerdişan perwaz
her yek yek tebeq ce eşrefî û zeř
ce şemamey muşk, ce ’ebîr teř
horgirtin pey bezil, şîrîn bê endêş
ce gêsû kerdin moşkîn mar be kêş
şîn we pay textiş kerdin nîsarş
ḧeyran bîn be şewq şem’ řuxsarş
nîştebê piř zewq ew zułf bo gułab
çun text zeřřîn qurs aftab
dewłet seray şa ce boy zułf çîn
kerdebê piř ’etir çun nafey muşkîn
axir ew xusrew lał bexiş lał poş
wat be bizurgan saḧêb ’eqił û hoş
şîrîn şexsêwen piř temkîn û sam
ce nesił şahan cem cay cem meqam
wêş hem ce ermen kerdenş şahî
xetmen be namş ’îsmet penahî
min derkarmen bikerûş nîkaḧ
eger bizurgan bwînan sełaḧ
watin: ey ḧerfe xeylê secîden
pesendîdey şa her pesendîden
bikeroş nîkaḧ be feřiř o îqbał
mubarekiş bo ta be hezar şał
çunke bey destûr şa bî sełaḧiş
be řesim wêşan bestin nîkaḧiş