ẍizil xwandin barbid az ziban xisru
Li pirtûka:
Şîrîn û Xusrew
Berhema:
Xanayê Qubadî (1704-1778)
2 Xulek
419 Dîtin
barbud sa dîş xusrew bî sozan
mîzrab da ne tar meftûl bozan
ne perdey «meẍlûb» neway řêz’efgen
bey tewr da cwab şîrîn ermen
watiş: be çeşim, şay newnemaman
emcar sed guna û yek tobe aman
řwê ce emirit er min şîm weber
serim da be seng sewł nazperwer
sext peşîmanim min ce kar wêm
şermendigîy to, şîrîn ama pêm
pey ey na’emrî lêm sadir byen
ce pay text to ’uzirxiwam nyen
’uzirxiwam her esir dîdey giryanen
şefaxwam qirçey diłey buryanen
şerit bo er şîrîn lêm bistanî ser
zeřře ce emirit berneşûn weber
şerit bo çêgewla řaz řêzey nebat
be cem bikêşun cařûy xakpat
xas bî, cey werter mida peyamê
gahê mikyastî de’wa û selamê
îse to ew řayç xo wenem bestî
mînay şerit û beyn be seng şikestî
bełê to hey şox dił ce xare seng
wêt ferhadit kuşt hîç namay we teng
minîç ełbete çun ew bêçare
mikerî minîç be merg aware
wextê barbud danay dił efroz
wanaş ey aheng ey nezim diłsoz
şîrîn wêş ce der da be zemînda
seyl best esrînş be řûy cemînda
bew tewr kerd feryad ew seru azad
cew feryad xusrew ama be feryad