minzire kirdin xisru ba firhad kwekin
Li pirtûka:
Şîrîn û Xusrew
Berhema:
Xanayê Qubadî (1704-1778)
5 Xulek
615 Dîtin
xusrew dîş ferhad wêł zam xeter
hîç meyliş nyen bew genc û gewher
bey tewr çenî ew derûn xestey derd
çend ’eqid daney lûlû guşad kerd
xusrew wat: ferhad to ne çi cayî?
ferhed wat: ce mułk xoş aşnayî
xusrew wat: çoge çi tewr mûyaran?
karşan çêşen, çi sen’et daran?
ferhad wat: çoge be sed arezû
mewreşan gyan, mistanan endû
xusrew wat: ferhad meger bê hoşî
dûren ce adab gyan firoşî
ferhad wat: ’aşiq bê edeb nyen
er bûreşo gyan hîç ’eceb nyen
xusrew wat: ferhad nadîrey řûy dewr
be dił sozanî, ’aşiqî bey tewr
ferhad wat: bîla dîn û îmanim
nek ’eşq be dił, be dîde û gyanim
xusrew wat: firên xo zułf ’enberîn
bo dest horgêre ce ’eşq şîrîn
ferhad wat: xusrew mer ewsa ce ten
gyan şîrînim berşo cey weten
xusrew wat: be xaw mwînîş her şew
ferhad wat: xusrew xaw nyen, kon xew?
xusrew wat: ce ’eşq ew şox sermest
key ne řûy dinya horimgêrî dest?
ferhad wat: ewsa pare bo cergim
şîrîn bwano yasîn mergim
xusrew wat: çi tewr mikêşî naziş?
er beyo çêşen ew payendaziş?
ferhad wat: dîdem yagey nazşen
serê ke darû payendazşen
xusrew wat: çonen şîrîn be xencer
be yek dîdey to byano zerer?
ferhad wat: be merg şîrîn diłber
dersat ew dîdeyç mawerû we ber
xusrew wat: ferhad çêş mwaçî, çêş
er kesê şîrîn bero perê wêş?
ferhad wat: ew kes er sikenderen
eger padşay her hefit kîşweren
mikerûn be têẍ sîmat gûn řeng
’ersey ser zemîn weneş tar û teng
xusrew wat: dostîş bo ber ker ne dił
dostîş perê to nedaro ḧasił
ferhed wat: dostîş şay keyxusrew xû
sewgend be tacit mer ewsa berşo
zor pencey merg bistanom nefes
tezeru řoḧim berşo ce qefes
xusrew wat: ferhad bo asûde ber
ey kare xamen, daro çend zerer
ferhad wat: ey kar puxten er xamen
asayş pey min meḧiz ḧeraman
xusrew wat: pey çêş sebirit lê dûren
ferhad wat: yaney sebirim xapûren
axir ’aciz bî şay feřřux nejad
cey mukaberey wêş çenî ferhad
fermaş: çi ’eceb şîrîn xîtaben
suxen sencîde wiḧazir cewaben
ne be genc û mał, ne be ḧerf û sewt
nimeyoş ’îlac îlla her bemewt
îmcar na’îlac şay fereydûn feř
salar şahan tac û kemer zeř
zwan kerd be têẍ cewherî folad
pey kendey koy seng bêstûn kerd yad
ferma be ferhad bewr poła çeng
ne guzergaman kwêy hen ce seng
îradey xatir humayûn bey tewr
te’ellûq girten ne řûy ’ersey dewr
ne koy xar û seng bołend bê der
bikerî guşad řayê pey guzer
mizanû ke ḧel ey kar muşkuł
ẍeyr ce to be kes nimebo ḧasił
be ’eşq şîrîn řaziş qend bêzen
be destey zułfiş ’enber amêzen
be pêç ḧełqey gêsûy kemendiş
be dîdey baram dehan qendiş
herçend mikêşî firê derd ser
ce fermûdey min xuddarî meker
ferhad horêza be tacîl û dew
bosa pay serîr bo muşk xusrew
watiş: be şertê şay dara nigîn
ce wesił şîrîn şox cam cemîn
dest hor bigêro şahane destûř
řenc berdey min bidaro menzûr
xusrew şî be xîşim bew tewr ce ferhad
wext bî bawero bêxiş ce bunyad
dîsan wat be wêş ew şay cem şiko
kesê cey şerte pey çêş bakiş bo
heta ke ferhad mişkawo ew seng
dinya migêło be sed hezar řeng
xusrew wat: ferhad weha şerit kerdim
eger horgêłûn ce şerit namerdim
sa toyç çun hujebir bewr poła çeng
řûker pe neberd ew koy xara seng
ce lay xas û ’am dinya seraser
dest û bird wêt numayan biker
ferhad xem kêş ce meynet dara
persaş: ce kon ew koy seng xara?
şexsê be dirust kerdiş řehnimûn
be qulley koy sext seng bêstûn
ferhad piř sam aşfitey serkeş
horêza ne ca çun kûrey ateş
horgirt çun zerẍam piř zor cengî
têşe û qułingey sed menîy sengî
dił serşar ce ’eşq bała zeř sitûn
lwa ta yawa we pay bêstûn
çun yawa bew ko mulaḧezeş kerd
girewa zar zar kêşa ah serd
ewweł ama aw bêçarey dił řêş
pey teskîn dił, hem temaşay wêş
be têşey seng taş połay ełmas řeng
saf kerd çun kaẍez qedrê ce ew seng
çun manîy neqqaş ne dewranş kend
neqiş eslemî şoxî diłpesend
kêşa hem ce řay saḧêb kemałî
ne pay eslemî neqiş xeyałî
îmcar be danş ta têşe şendiş
be sed ẍemze û naz nezaket kendiş
şîrîn bew şoxî, xusrew bew řendî
şebdêz her bew şikił, bew diłpesendî
pey çêş? mer bew nexiş şox dilaram
perê kendey seng bigêro aram
bełê waçe hey ferhad diłteng
wextê kendî şikił şîrîn ne řûy seng
çonit dił ama be bê endîşe
sûřet şîrîn taşay be têşe
deyse řêze bay wer ce gyan kenden
kê têşeş ne řûy yar wêş şenden
be erwat qesem ye ce to ferhad
hîç qebûł nekerd«xanay xan qubad»
aḧir bey destûr ferhad diłteng
pey teskîn dił kendiş ne řûy seng
şîrîn bew berqe û xusrew bew tomar
be ẍeyr ce şapûr, şewdêz nazar