firistadin xisru şapur ra bih nizd şîrîn
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
465 Dîtin
şewê ce şewan xusrew be zerûr
tełeb kird be cext ferxunde şapûr
watiş: mirweten şapûr çînî
dił poşan ce xem perdey muşkînî
ewende ten suftey ’eşq şîrînen
kogay zuxałim bo ’ebîrînen
ce cergim qirçey buryan mixêzo
ce zamim qetrey zuxaw miřêzo
tomar şahî û tac zeř nîgar
bîlla lêm byen be tewq zunnar
dîdem bê xawen çenî xeyałan
peşêwim çun zułf wenewşe xałan
çêş mibo şewê çu bedir kamił
ew semen sîmay zułf deste sunbuł
çun cewanmerdan nadîrey eyyam
miryem nezano bawerîş welam
me’lûm bo ce lat derûn piř derden
newaçî ce ew ye meyliş serden
min perê sełaḧ dewłet xwahîy wêm
pey ḧîfiz îqbał padşahîy wêm
meḧrûm pay text ew xurşîd şêwem
melûlter ce zułf lûlyay lêwem
newa bwaço ew şay bê endêş
xuda nexwaste min bêzarim lêş
nimedûn be zat pak îlahî
tayê ce zułfiş be tac şahî
xuda şahîden neqqaş çînî
bêzarim her şew ke şew nişînî
pey çêş? pey řuxsar xurşîd bêz ew
pey pey meygûn leban şeker řêz ew
neş’ey badey saf erẍewanî řeng
bedteren ce ja hefit tas ferheng
bełê çun miryem kinaçey qeyser
firê serkeşen midom derdiser
sełaḧ her êden hîç nezano ew
be cayê xełwet binîşîm çend şew
buyarmê be şad dinya çenî ew
ew her şîrînen, min her ew xusru
werne er miryem pêman bizano
derlad gyan wêş ba wêş mistano
şapûr «ḧisb alamirErebî» ew şay cewan bext
te’ellul nekerd, horêza be cext
řewan bî be qesir çun betir piř coş
ama we pay text şîrîn mey noş
ḧałat xusrew yekayek ce laş
îzhar kerd tema ustad neqqaş
wat zeřře ce song kinaçey qeyser
xusrew perwêz mikero ḧezer
werne pey nedyen bejin bałay to
her wexten bibo be xak ney ko
çun şa bey destûr arezûy toşen
pey to firawan dûd û endoşen
eger meylit hen bała zeř sitûn
pa binyer be cext ne pişt guł gûn
îmşew ce řaf lutif yelẍar der be dew
bişîm û mişkoy bo muşk xusrew
nîhanî çenî xusrew be dił şad
koko koy xusrew xem bider we bad