dastan xwandin û nwaxtin barbid dir micils ’îş pirwîz hirimz
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
248 Dîtin
ama barbud çun bułbuł sermest
leb xendan çun guł burbutê be dest
nîşt ne pay serîr xusrew be î’zaz
ce sî destan saz leḧin xoş awaz
guzîn kerd pey şay lałbexiş mey noş
gahê dił miberd, ga mistana hoş
gahê be neway «genc bad awerd»
aram ce derûn ’aşiqan miberd
çun ca «ga û genc» mibî neẍme senc
zemîn ce şadî horimşana genc
ce «genc soxte» çun neway bułbuł
mişkawa ẍunçey guł çun destey guł
hem be «şadrwan mirwarî»y diłber
piř mikerd bîsat perwêze gewher
«text taqdîsî» çun mikerdiş saz
murẍ xeste dił mawerd ne perwaz
ce neẍme «naqûs» şox piř xuřoş
ce dił miberd sebir, ce ser miberd hoş
ce «ḧuqqey kawis» cun qend mixêza
şeker şîrey wêş derlad mibêza
wextê ke mijend saz «mîşk dane»
mikerd ce awaz boy mîşk we yane
ta ce «arayş xurşîd» mida dem
megurêza supay serhengan xem
minwaza aheng «nîme řoz» çun saz
mawerdiş be řeqis zuhre be awaz
ce semtûr û saz mijend be aheng
seday te’sîrş mitawna seng
ce «qufił řomî» dił mikerd guşad
koko kogay xem ce dił mida bad
herga be aheng «serustan» mijend
bezim şa mikerd piř ce şîrey qend
ew «seru sehî» minwaza be zewq
’aşiqan temam mest mibîn ce şewq
ga «noşîn badeş» ce cam noşîn
«la yi’qilErebî» mikerd şêxan pak dîn
mikêşa çun «saz newroz» ne perde
mikerdiş îman ’aşiqan herde
mişko ce neẍmey «muşk małî»y ew
muşkîn bî çun řaz şîrîn xusrew
mikerdiş ce ban diła «řay şewdêz»
berizter ce şahan demax perwêz
sedaş deng saz şahan mibêza
ce mewday penceş meḧşer mixêza
ce şefay meqam «şeb feřřux» temam
meclîsî mikerd bêhoş û sersam
çun ce «feřrux řoz» deda mikerd berz
mibêza neẍmeş neẍmey saz terz
çun be «ẍunçey kebik durî» myawa
be «nexçîregan» mwerd be sema
herdem be ẍemzey «kîn syawiş»
must ne perdey cerg û dił kawiş
ce«kîn îrec» çun negmey dawud
ce bezim şahan mixêzna dûd
be «baẍ şîrîn» çun şurû’ mikerd
zewq şîrînî ce şeker mwerd
barbud bey tewr destan be destan
jend perê perwêz zuhrey serdestan
xusrew be çarey barbud ew řo
bexşa genc û mał cewahêr bê şo
aferîn ce zat çun xusrew şayê
genc xusrewî be bê sedayê
bew sazendey şox xoş awaz bexşa
ce řay sexawet zeřre nelexşa
yaran ne dewran dinyay negbetî
ce tebi’ kerîm saḧêb hîmmetî
sîway bendegîy zat xudawend
hîç xaster nyen be xuda sewgend
sełaḧ her êden hey diłey derwêş
hey diłey piř dax, daym xatir řêş
herta zîndenî çun «xanaNasnava edebî»y lał senc
mibexşo ce duř suxen bey tewr genc
be bexşindegî daym her xû ker
wêt ce da’îrey dûn berker weber
pipey çêş? ne ayîn ehil danşiwer
ce dûn hîmmetî hîç nyen bedter