baz girdîdin xisru û şîrîn az siḧray miẍan
Li pirtûka:
Şîrîn û Xusrew
Berhema:
Xanayê Qubadî (1704-1778)
2 Xulek
493 Dîtin
çun mîşkîn peřend şew ce şołey nûr
ne ’ersey dewran gêłya be kafûr
ce merz muẍan şîrîn û perwêz
baz kerdin xeymey xusrewîy guł bêz
çenî nałey çeng, neẍmey bang ’ûd
berdişan teşrîf be seḧray şehřûd
gahê ce şařûd kerdişan şikar
ce murẍ weḧşî kuştişan hezar
gahê çun behram ne seḧray hîndûr
wistin be yekda çend ahû û çend gûr
dinya bey destûr beser miberdin
ga ’uşret, gahê neçîr mikerdin
çun sewad xet zułmetda dyar
mexfî bî xurşîd ne perdey pêwar
newber nemaman destey zułf çîn çîn
arastinin pey şa bîsatê řengîn
zêba ’urûsan ta ke şeq bi’ şew
pey tefrîḧ tebi’ şîrîn û xusrew
řeqsan bîn çenî neway saz ney
şîrînter ce řeqis řeşḧey cam mey
nałey neway saz muẍ beçey mey noş
seday meykeşan sebûy mey be doş
ce sewme’ey qudis çerx exzerî
mawerdiş be řeqis zuhre û muşterî
ce boy mîşk û ’ûd ’ebîr û ’enber
ce ’etir guław, ce dûd mecmer
cergey xusrewî deşt û ko û sara
mibêza boy bezim řengîn dara
ẍerz hîç şewê ce şewan bey tewr
nimewîn bê ’eyş ’uşret ne řûy dewr
yaran ne ’ersey ey dinyay fanî
cey weşter çêşen sa zîndeganî
buyarî dewran çun keyan key
be saz û suḧbet, be me’şûqe û mey
dû dest ḧemaył bê xof ce eẍyar
bikey ne gerdin dost wêt her car
binîşî ne say zułf ’enberboş
bigêrî be des şemamey lîmoş
ne carê sed car be şew ta be řo
çun destey nergis boş nya we bo
hey hey cew tuẍyan ’eyş û îqbałe
cew coş şadîy şay kemer lałe
ga çenî şîrîn sergoşî mikerd
ga şerbet ce le’il şîrîn mwerd
ga mibî peştan we bejin bałaş
ga mikerdiş seyr xałan ałaş
bey tewr mubara şay nezer bazan
şew çenî şîrîn şay şeker řazan