risîdin şîrîn bih çişmey taqbistan
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
583 Dîtin
mustewfî dîwan defter xaney ’eşq
perê ’aşiqan bey tewr da sermeşq
çun şîrîn ce şewq xusrew perwêz
awerd û perwaz bew destûr şebdêz
poşa berg zerd wêney ẍułaman
řûş kerd ne řay řas şay newnemaman
ce ters řazen be wext û bê wext
mişî be řawe dewr mida be cext
bê xaw û bê xor be şew ta be řo
tey mikerd çun teyr sara û keş û ko
herçend ce bedkar fire mitersa
ga ce řawyar eḧwał mipersa
be şew hem be řo sewł bo sunbuł
tey mikerd wadî menził be minził
dimay çarde řo wext direngê
řext îqamet west ne pay sengê
fireş pê neşî ne çerx exzer
ce yaqût zerd xurşîd xawer
gum bî daney duř kewkeb çend hezar
ne durc řengîn çerx zeřingar
şîrîn horêza dîş çesme sarê
çun ceşmey ḧeyat ne mîrẍuzarê
awiş ce safî midrewşa ce dûr
xaster ce çeşmey «şerabaً tehurErebî»
şay teberzed řaz şox semen bo
newxêzter ce tûł newnemam no
ama çun şabaz tewr nexçîr doz
ne çwar dewirş nîga kerd be soz
nedîş ne dewran ew çeşmey exzer
be de firsexî «dyar albeşerErebî»
çun ce gerd řa ew şay şîrîn deng
ayney ḧusinş gêłyabê ce řeng
ten xeste û hîlak ew řa ke dûr bî
çun wił ne baxçey be aw zerûr bî
pyade bî ne pişt şebdêz be cextê
dese řeşweş best ne pay dirextê
ce berg bo mîşk şehzadey ermen
’uryan bî çun guł perwerdey çemen
fotey bûm mawî zeř tar řengîn
bestiş ne pay naf bo ’etir mîşkîn
be te’cîl ew şox řîştey îlahî
wêney xurşîd nîşt ne borc mahî
wextê ẍiłtya ne awda şîrîn
çun qaqum ne řûy sencab řengîn
pêç ḧełqey zułf syay bo ’enber
pexiş kerd be awda cun dûd mecmer
gêswan awerd we řûy aftawda
kêşa wêney mar qetran be awda
ne ne destey zułf mîşkîn be awda
pexiş kerd wêney hewr be řûy aftawda
axir ke şîrîn cemîn wêney cam
firîştey feř bexiş nadîrey eyyam
pey baxçey ḧusinş ne çeşmesarê
peyda kerd bey tewr mîşkîn weharê
sa ba new çeşmey awda bimano
çun soney ser sebiz her bał bişano
herçend ke wesfiş şîrey qend bêzen
mikermêş mewqûf, nobey perwêzen