tiłetłî ceste û heřeşeyek le tarîkî!
sûtan û be sûtmakkirdin û cestey ême û
xakî ême leyek danebřawin.
em çarenûse hełgîrsawe, em mêjuwe sûtemeřoye,
berdewam beşêk buwe le lirfelirfî kiłpekirdin û
le encamîşda dîrokî xołemêşê ke bê pisanewe
karesat û kostî hełqirçawî gêřawetewe. bûnî kurd û agir,
le dwaneyekî ebedîy azar û řûnakî eçin.
carêk ême kirdûmane be sunbulî manewe û
zor carî tirîş ew kirdûynî be qerebrût!
em qederî pêkewe jyanî ême û agire, dêrîne dêrîn
le kûrey be nałenałî muẍekanî zerdeştewe û
le nizay ser be nûrî gatakanewe
le qurbanîyekanî mîdyawe, lew mencenîqanewe
ke bo yaxîbûnman daxrawe, ta em sate wexte
lew serdemanewe lay êmey biłêseperist
nîşaneyek bo mizgênîy serkewtin, meşxełan buwe û
le bêhudeyî û na’umêdîşda, agir le cesteberdan.
ême û agir têk aławîn
çîrokî agir û çîrokî sûtan, têkeławbûnî
jyan û fenabûn, bûn
têkeławbûnî řwan û hełwerîn. awêtebûnî lanke û goř û
heres û hestanewe û
beyekdaçûnî guman û yeqîn, çîrokî ew dozexane bûn
ke hendê car beheştiman tya řiskandûn û
le baxî pişkoda gułman çinîwetewe.
le dwa sałî sedey bîstemîşda, eweta her agir ebêtewe bew
řemzey gyanmanî pê ebexşîn bo ewey leşman bikatewe
kiło xełûz û
bew kiłoyeş azadî leser hawarekanman binûsînewe
eçîne biłêsekanewe
bo ewey le mirdinda manayekî nwê be jyan bibexşîn
eçîne naw řûnakîy daxrawî mergewe
bo ewey lêy neyeyne derewe
sîrwan way kird
«sîrwan» xoy dagîrsan
bo ewey bêzarîyek bikujênêtewe
yan bo çend çirkeyek heřeşe le tarîkî bikat
yan bo ewey peyvêkî nemir le şewêkî çiřî bêdesełatîda
bika be şî’rêkî giřdar
dîsan bo çend çirkeyek û bes
tûřebûnî zamêk le dinyayekî keřewałe
ewe teqînewey şaxêkî goşegîr û weřs bû
teqînewey tirs û teqînewey bêdengî
hełpijanewey şepolêkî serbiřaw
ewe nařezayî řisteyekî bê demamk bû le dinyay demamkidar
ewe satewextî lêkdanî zewî û asmanî ḧeqîqetê bû
dařmanî aram û
heresî diłnyayî û
řûtbûnewey řeşebayek bû le berdemî
zerya bêbakekanda.
le hemû xoşewîstîyekî gewreda
lûtkeyek heye, lûtkey twaneweye legeł ḧeqîqetda
lûtkey biřyar û negeřanewey
espî be kuřjin be çepokanî berdî oqre lê biřaw.
lewêda jyan daway mergêkî nwê ekat.
lewêda řwałet û cewher le yektir cwê ebnewe.
lewêda xewnêkî hetahetayî ebînrê û
zeman ebê be yek zeman.
meznitirîn ewîndarîş her ewanen ke be řoşnayîy cestey
sûtawî xoyan diř be metirsî û doşdaman eden.
sîrwan way kird.
ew le cestey hejar û namoy xoy zyatrî şik ne’ebird û
ewîşî da be ziřey zengêk
be zayełey awazêk û
be taqe hawarêkî sûtaw
tenha le gêjene gewrekan û gerdawî karesat û metirsîşda
mirov û xoşewîstîy mirov
řûbeřûy řastîyekan ebnewe
cyawazîye here gewrekanîş
her le astî ew cumganeda der’ekewn
ke merg abłuqey dawin
le beramber mergida, behay jyan taqîy ekirêtewe
ew êwareyey sîrwan xoy kird be newroz
ne newroz hebû ne ew agireyş kirabowe.
ew êwareye bûlêł geřayewe bo tendûrî xorinşîn
êwarey mana bû, êwarey ledaykibûnêkî tirî meraq
êwarey beyanî û
êwarey tenyayîy hemûman.
lew êwareyeda û le berdem telefzyonêkî xwên leçaw têzawda
le berdem dîmenêkî zîndûy nuşustî hîwada
ke sumbulêkî le agira zawî bûbû be dawî gişt cîhanewe
lew êwareyeda
yekêk firmêskêkî agir da û
ewî tir axêkî řwand
min şî’rêkim hełpiçuřka û
bełam «sîrwan» cestey xoy fiřêdaye
nêw tiłetłî nêrîney agirêkewe û
bew tiłetił û nêłenêłî cesteye, demuçawî
guman û řařayîy hemûmanî řoşin kirdewe û
pêy witîn: min meznitirîn şî’irim
be azarî leşim nûsî.
sîrwan le sermay hejarîyewe bû be aşnay agir û
tenyayî birdye naw hunerewe û
şewanî ser şostey şeqamekan hengawî lanewazî
kulêre û aw, le zistanda agirî naw tenekey sîley
kołan û le hawînda xwardinî şûtî û tarîkî beyekewe,
be řojîş xulya geřokekanî bêkarî û têřaman le
gilêney ḧerf kirdyan be hunermend
her hunermende hejare bêderetanekanîşin
řastigoyîyan le sadeyîyewe hełhêncin û
her ewanîşin le zimanî bêgerdî pelke gya bigen û
bizanin pîrozîy nanêkî germ û
qile hencîrêkî geyîw û le çîdaye!
her ewanin, bitwanin ewende le mirdin nizîk bikewnewe
ta eçne çawî nehênîyekanî ew dîw gerdûnewe.
kamêrakanyan ewende le metirsî berne pêşewe
ke îtir xoşewîstîyan derfetêkî tirî bo nemênêtewe
cige le hełgîrsan û hełqirçan.
sîrwan way kird.
ew dwa wêney leser avzînî mergewe girt
ew dwa wêney êwareyekî kiłpedarî
le berdem fiřokeyekî
barhełgirî namoyîda girt
ew dwa semay lenaw gerûy agirda kird û
tacî pişkoy leser kird û
ewsa mird!
hemû ’aşiqê, ebê dwa goranîy xoy biłê:
le her cêjwanêkda bê, dwa dîdar legeł mirdinda saz bikat
le jûrêkda, leser şaxê, le şeqamêkda, le deştêkda
leber bařêzey zimanda yan baranda yan leber awêney hetawda
sîrwan cêjwanî xoy le bêşełanêkî agirda dyarî kird
ke damirkayewe bû be dirextêkî sûtaw û
be koterey lewḧeyekî řeş û sipî
em mirdine lenêw hunermendanda û le hemû cîhanda
wek tablo gewrekan
wek ’eşqe gewrekan
wek dozexe gewrekan
degmene.
degmene wek xaçî ’îsa û
şewî yełda û
tenyayîy kurdistan.
sîrwan be nasortirîn tabloy dwa sałî
sedey bîstemî ême bû.
amajeyekî giřtêberbû, řuwew zułim.
fiřînêkî giřtêberbû, le tarîkistanda.
nîşaney pirsyarêkî giřtêberbû, le berdem dinyada.
ewe sîrwan bû:
lêrewe çawim lêye biłêse bałyetî û efřê.
lêrewe eybînim: ew qeqnese û wêney
’eşqêkî ebedî le asoy xołemêşînî
em wiłateda ekêşê.
lêrewe çawim lêye: «sîrwan» lewê
le berzayîye biřonzyekanî řoḧda
yekêk le kiçe sûtawekanî nîştiman, lew kîjaney
le małe zîndanîyekanî êmeda, demew êwareyek
xoy û tenyayîyekey sûtawin
sîrwan lewê eynasêt û be giřewe eyxiwazêt û
îtir eyka be dezgîran.
min lêrewe çawim lêye, sîrwan buwe
be sûre’estêrey bałdar
hemû şewê, lenaw beḧrî meřmeřewe
dête derê û heł’ekşê û beramber taqe pencerey zîndan
bo çend satê řa’ewestê û şepqekey serî da’egrê û
lew dîw pencerey kiłpewe
siław eka le «ocelanPerson»!