kêłgey quřgêkî kêłraw!

dozîmewe!
pênaseket, le gîrfanî hełbestêkî bê dałdeda
ke zistan eda be xoyda û, birsêtî eka be serîn
tenya enwê, lejêr çetrî pînekirawî şewêka
ke tarîkîy hełî edat
tenya enwê û xew ebînê:
«çolekekan, leber pencerey hetawa bałefřê,
bo zeytûnî çawî yafay řêjraw eken
mêrgekanî «benî ’amir» le cogey gerdinî xorda
şepol eden.
lenaw kiłafey hewrewe, tałî řengawrengî baran,
qijî lîmokan ebestin be serincî estêrewe!
beřêweye
kejaweyek beřêweye giryan goranîy tya ełê
giryan şimşałêke nask, şwanî bize fûy pya ekat»
dozîmewe
pênaseket «serḧanêke» le wagonî,
şemendeferî azara
carêk, destigêřî řojnamey zamekane.
carêk, hewałî xinkawî îstigekane.
carêkî tir, eybînmewe «mewalêke»
legeł řûbarî urdina serberew xwar ebêtewe
le kêłgey quřgî kêłrawî naw «celîla»
be dway barana egeřê
mewalêke, pasewanekan eygirin eyxene naw:
qefezî ałtûnî şawe û, zamdar ebê.
pênaseket, gwêzanêke
«si’ud» řîşî pê etaşê!
xawlîyeke, şajin leşî xoy pê esřê
serim, serit: qenefeyeke le hołî banqekana danrawe
«fîşî» yasa wirginekan dên leserî da’enîşin!
pênaseket
nawî toy leser nûsrawe û wêney minî pyanrawe
katê, bizmar be ser singî honraweta da’ekutin,
honrawey min xwênî lê dê!
dozîmewe, nîştimanit:
masîyeke lenaw tořî zeryay sipîy naweřasta
gera le demî qulapî merga exat.
keştîyeke bê bendere,
xinkawî bîst sał bar ekat.
tenya enwê lejêr çetrî pînekirawî şewêka,
ke tarîkîy hełî edat
tenya enwê û xew nabînê:
«beřêweye, waşey çawî le asmanî quřquşmewe biřîwete,
zerneqûtey naw hêlaney bêdergakan waşey çawî qulapêke,
tořî şew fiřê edate naw řûbarî hetawewe ta - deng - bigrê.
efřê û efřê bałî misî şeřî gêtîy sêhemînî hełgirtuwe.
be denûkî asnîna ałay řayxî çwaremî hełkirduwe û dûkełêke,
jeng xwardiwêtî. marî dûkeł, pêç le sikî daristanî řiqa exwa.
marî dûkeł be fîkey giř le kunî zîndanî merga dête derê»
ey hawřê
dozîmewe û nemdozêwe, pênaseket.