pizîskey çexmax kafîy karmen
From the Book:
Dîwanî Mewlewî
By:
Mawlawi Tawagozi (1806-1882)
2 minutes
1175 views
pizîskey çexmax kafîy karmen
çi wext û wadey ey guftarmen
diłey kos keftem hem tem kerdewe
perdey sebûrîş temam diřdewe
nała û girewa û xulyawe û xul werd
cew bûłî derda wêş saman sa kerd
îse bûłî derd kero we serda
dek siłamet bî çît î xeber da
diłe poşabê perdey sebûrî
sazabê çenî derdekey dûrî
perdey sebûrîm diřya, řołe řo
řîşey cergekem biřya, řołe řo
we nakam hîcret kerdem, řołe řo
daxan gişt we xak berdem, řołe řo
xan û man xamoş bêto, řołe řo
etfalan medhoş bêto, řołe řo
tełmît sya poş bêto, řołe řo
xatûnan bêhoş bêto, řołe řo
kam wesifit xeyał, kam şêwet yad kem
pey kam xesłetit dad û feryad kem!
pey ’eqîde û dîn musłimanît, dad!
pey şêwey şîrîn newciwanît, dad!
pey ew ’eqił û fam hoşyarît, dad!
pey xoş nîgarî û xoş řeftarît, dad!
feryad pey îxlas, ax pey ayînit
pey aẍey dinya û pey aẍey dînit
her kes dîm, dîdem, meylî to pêş bî
kê bî? kê ce to xatirş řêş bî?
fełek cergiş den we mewday çiłda
kam xatir řêşîş bî ne toy diłda
dewirş wey tewre, ey cewre awerd
min ḧesretmend kerd, to bew derde berd